عيون الليل بتهوانى
ف عز البرد تغوانى
تسهرنى فليالى الموت
تعلقنى بنجوم سارحه
ف سما ضلمه
عيون جارحه
أعدٌ سعات من الحرمان
ويوم ورا يوم
أعيش مجنون
ومتعلق ورا نجومها
وزى الطفل متشعلق بأضوائها
ومحتاج ياما م الاجابات
ولما النور يشقشقلى
ادان الفجر يفوقنى
ويجى نهار
وناس ملكوت من التوهان
ورحله دايمه دواره
بتخنقنى
الاقى الحلم ولى وراح
وطلعت شمس تحيى صباح
فأشتاق تانى للضلمه
مانا عايش سنين ظالمه
ونجمه تايهه ف الظلمه
بتعرفنى وأعرفها
ليالى عيونها ف سكوتها
بتحكيلى
وأحكيلها
من الأشواق
.....
عيون الليل عيون سمرا
وننى برىء من النجمه
وبيضوى ف سما ساكته
وعايش ياما م الاحلام
وشايل همى ف سكونى
يضمد جرح يجى تانى
جراح عايشه باحزانى
جراح محفوره بوجدانى
تداوى الجرح ينزف جرح
ومش عارف انا القاتل
ولا المقتول
.......
عيون الليل بيقتلها
ضياء الشمس
وصبح غريق
فتلقى الحلم ضاع تانى
مع الاحزان
كأنوا ما كان
سنين عايش بلا خلان
ومتغرب بقلب كيان
مسافر فى بحور نفسى
وانا القبطان
ودفه عايشه بأديا
توجهنى لشط الخوف
وموجه طارحه اشوكها
بلليل اسود
بتسحبنى وتجرفنى
بترمينى ف حب قديم
ف عز الليل
وأنا مسكين
عيون الليل بتحلملى
وتحملنى تجاه لجنون
وانا مسجون
ما بين يأسى
وبين ماضى من الخيالات
عيون الليل ما تعرف خوف
غير خوفى
ما تعرف صمت ف كسوفى
ولا اوهام
فمين فينا اللى بيسوقنى
لحلم لقيط
لفرحه تايه ف سنينى
لحب عنيد
لبسمه جايه مكسوره
بألم وأهات
ومين فينا بيجلدنى
يصحى الموت مابين ضلعى
انا تايه ولا مدمن
عيون الليل
انا عاشق لا مكسور
بصمت سكوت
انا دمعه ولا بسمه
ف عز الجرح
طريقى كان طريق اخضر
ولا ساحه لحرب وضرب
ف عز الموت ما بتألم
ف ليل الصمت بتكلم
فى بحر فراغ عايش بحار
ف نجمه ضاله لمسارها
وراها بجرى بالمشوار
ف عز البرد محاصرها
وابات سهران
كانى بصيف
وبستمتع بنسمة ليل
عيون سمرا وبعشقها
ولادى طيف
هويتك قبل ما اتعرف على ليلك
ولا ليلك هوا فيا جراح الليل
فبيحاول يرجعنى
لحلم الموت
يرجعنى لحب قديم
طويته سنين
وتهت معاه
عيون الليل بتهوانى وبهواها
نعاتب بعض باغانى
لانساها
فتصدمنى بعيون جارحه
ف سواد الليل
واشوف فيها امال ما تموت
ف حب قديم