على باب البيت
مرسوم
طير بجناح مكسور وحصان أعرج
وعلامة ممنوع
وعيون مسبوله
وفوق الخد دموع
على باب البيت
منقوش بالفحم الاسمين
مريم ويسوع
ويمين الباب بشويه
دلفة شباك مخلوع
وقلام مكسوره وكام كراسه
وكتاب مقطوع
وجماجم عايمه ف بركة دم
وحمل ضلوع
وف وسط الدم البركه..بتسجد
سبحان الله...زهره بتسجد
فى خشوع
.................
وف وسط الشارع
وقفت بنت الملعونه
وفوقها شوية خنازير
خنازير
فوق بنت الملعونه الدبابه
وساعتها تحس ان الأرض..
بتطرح
غربان وديابه
وتمر...تمر سحابه
وسحابه تجر سحابه
وتفتح عينك تلقاك.... مش فاهم حاجه
وساعتها
هاتتأكد انك.... سبحان الله
عايش فى الغابه