فينك يا وليد ؟
مش كنت ياعم ليلتها تقول
ان انت خلاص ناوي تفارق
و تغيب علطول
بقى بعد العشرة اللي ما بينا
حتسيبني وحيد ؟
لأ ، مش معقول !!
طب كنت يا عم عملت حساب
للعيش و الملح
و اللا احنا يا دوب بس آخرنا
نتلاقى فـ جرح ؟
دا ما فيش من كام يوم
انا و انت ع القهوة بنحكي
و بنهرج
غلسنا على الشلة اياها
و فضلنا نغيظها و نتفرج
بأمارة ما لمحت دموعك
و سألتك مالك ؟ ما تروق ؟
قلت لي : ما فيش بس قالقني
الكدب بشكله المتزوق
سنتين بيعدوا على الثورة
و محصلشي جديد !!
و انا يومها اتفلسفت و رديت :
كله بمواعيد !
فرحانلك بس اللي تاعبني
و صدمني أكيد
إنك ترضالي أنام و اصحى
على صورتك مكتوب تحتيها
في الجنة شهيد !