" عَشرة طاولة " خسرها علاء عيسى

الإهداء
الى الأساتذة
النقاد ....
لكى تتاح لكم فرصة النقد .
فلابد من إتاحة الفرصة لنا للكتابة ...

أغسطس 2001

" عشرة طاولة "
خسرها علاء عيسى






الدنيا دواير
جوّه دواير من حواليك
والناس بتدوْر فى دواير
دايره بتخنُق فيك
تزهق وتسيب البيت
أو يمكن بيتك هوَّ اللى يْسيبك
تخرج
علشان هوّ الزهقان من قرفك
بتحاول تمشى ورا رجليك
لَجْل ما تهرب منهم فيك
الناس فى الشارع
زىّ الناس فى البيت بالظبط
لاتنين عايزين شويّة ظبط وربط
مصر دى خنقة
وابن الريف م الصعب علية يعيش
فى الزنقة
منهم لله
الناس فى الدار
ووْلاد الكار
قالوا لى الشعر فْ مصر يأكل عيش
فى كياس
ويلبِّس هِـدمه نضيفه وأحلى مداس
منهم لله ...
وْلاد الناس
ييجوا يشوفوا الشاعر ...
عايش بالتسليف
الشاعر
أكله وشربه شويِّة تصقيف
وإن زاد الجوع
يضّطر يْحُطّ الجوع
فى رغيف
شى لله يا مثقف
إيش حال التثقيف .. ؟
ياااه إتنهد
شاطر بس تقول :
الناس الأغنيا فقرا
وانت فقير المال ولكنك
أغنى الناس
قصدك إيه ..؟
شعرك .. ؟
حبة كلمات مرميه ف قلب ديوان !
بتعوض نقصك بكلام ؟
وللا بالصورة الألوان ؟
قوللى يا شاعر
مين راح يقرا ديوانك ..
غيرك
يمكن واحد صاحبك ...
يهديك إصداره القصصى
ويضطرك تقراه
علشان يقراك
ميت مرة أقولك :
حاول تمشى
الدنيا مش فردة جزمة ..!
لو طلعت واسعة ترجعها
حاول تحشى الجزمة بحاجه
حاول تمشى

يمكن تلحق تعمل حاجه
يااااه إتنهد
إياك فاكر بعد الشّرْ حَ تاخُد نوبِلْ
" شوقى ضيف" ما تكرَّمش فْ بلدك
"شوقى" إتكرَّم من برَّه
يعنى استنى
لمَّا الناس من بره تشوفك
يا كسوفك
مبسوط بالست الأكبر منك
بينها وبينك
راجل ميت
على حبة أحاسيس مرميه
فاكراك لسه مشاعرك حيه
أه لوكانت تعرف

إنك ميت من جواك
كانت تقفل بابها فْ وشك
زىّ البنت إيَّاها تمام
لمَّا بترمى الشعر ف وشك
يااااه إتنهد
يمكن آهه تنزل منك
تسحب روحك
تاخد أجلك
تاخد قضبان القطر معاك
ولْحَدّ ما توصل أوِّل شارع "ناهيا"* "1"
إستنى ..
بص هناك

صاحبك بينادى عليك
قاعد وسط الناس ع القهوه
ماسك زهر الدنيا ف إيده
وْقاعد يلعب
وانت تبص عليه
تستغرب
إزَّاى بسهوله بيرمى الزهر ...
وْيرمى قشاط الطاوله بسرعة
وانت ازاى بتعد بعينك
حاول تلعب
صاحبك كل ما يرمى الزهر بيكسب
وانت تبص عليه تتحسر
كل الناس حواليك كسبانه
وانت "الدُش" معاك بيخَّسر

إتنيل والعب
صاحبك مبسوط ع الآخر
باسط كل الناس ع القهوة
باسط حتى الراجل صاحب القهوة
كل شويه يوصى ييجى لنا
شاى على قهوة
وأنا جيبى مش حِمْل القهوة
وما فهْش غير جنيهين
زائد ربع "جنيه" مخروم
ماحنا ببقينا ف نص الشهر
هُمّا فى جيبى وكل فلوسى
كان ممكن أرمى جواب التعيين ع الأرض
وافتح شركة كبيرة
واعمل ثروة كبيرة
واعين كل الناس
بفلوسى
كنت ساعتها
ممكن احزِّم كل بنات البار
بفلوسى
واتجوز أجمل بنت
لكن خفت
البنت تكون عايزانى
بس عشان تعيش بفلوسى
كان شرط علىَّ
إنى أقول للراجل صاحب الشغل
إنى فى صباعك خاتم
وإنه لوحده ف كفه
والكفه التانيه لكل العالم
بسّ رفضت
وقبلت ابقى موظف
دخلى بسيط وأعيش ويَّا الناس البسطا
بس فوجئت
البنت الأجمل بنت
بترفض عيشتى بعد ما راحت كل فلوسى
والواد بياخدها ف إيده ونازل
رقص
إتنيل والعب
صاحبك مبسوط ع الأخر
ماسك زهر الطاوله ونازل
قرص
صاحبك قرَّب ياكل
قفِّل كل خانات الطاوله لصالحه

صاحبك فعلاً أخد الدور
صحصح حبه
صاحبك غلبك
واحد مَرْس
صاحبك فرحان ومزقطط
نغمة "سحرانى" ح تخرم ودنك
خَّد محموله ف إيده
وإستأذن منك
صاحبك قالك :
جهِّز نفسك
ح أطلع بره ح رد عليها
ثوانى راجع لك
تطلع عينك بره القهوة تبص لصاحبك
عينك تلمح بنت بتسبق


واد بيحاول يمسك إيدها
البنت بتشبه نفس البنت
اياها
كان ممكن أعمل راجل
يوم الليله اياها
وأنا شايف إيده بتسحب
تمسك إيدها
كان لازم أقطع إيدها
لمَّا عرفت انها
ساكتالُه
كان لازم أكشف كل الكدب
قُباله
لجل ما يعرف ..

إن حبيبته قبل ما ييجى بتبقى حبيبتى
كان لازم واحد فينا يضحِّى
ويمثل دور النايم
لجل التانى يعيش
أراجوز
كان ممكن أبقى التانى وافوز
واتنرفز
لكن خفت الليلة اياها تبوظ
فَضَّلْت أشرب شاى على روح التانى
واسيب الملعب كله
وادوَّرعلى ملعب تانى
مافهش واحده كدابه
وْ واحد زيّى جبان
على واحد زيُّه بيفرح
لمَّا الناس بيقولوا عليه
محظوظ
صاحبك بيكلم فيها
فرحان ع الآخر
وانت بتسرح
والأزهر صوته بيعلى
يدخل ودنك
عينك تدخل جوه القهوه
تْبُصّ عليه
الأزهر مبسوط ع الآخر
جاهز يقبل أى تبرع
نفسه يراضى كل الفقرا
حاجه تزهَّق
كل شويه الموجز يبدأ

"عبد الله" و"بشار" فى الصورة
و"الريس" بينهم
زى الأب . وسط ولاده
وقت الفرح ووقت الشده ...
بْيبقى ما بينهم
عايز يعمل حاجه لحد
بس بشرط
إن الحَدْ ما يكونش يهودى
"الريس" زعلان ع الآخر
متضايق م الوضع الراهن
صوته بيوصل كل العالم
شايل هم الكون على وشه
"بوش" بين "عرفات" و"شارون"
ومرّكِّب وشِّين على وشُّه

عايز يعمل حاجه لحد
شرْط يكون الحد يهودى
"أمريكا" بتلعب لعب كبير
والماتش مولَّع بين الاتنين
"مصر" بتكسب
والماتش بيخلص
صفر - (2)*
واتنين م القدس بيرموا أرواحهم
جوّه ميدان ويموت (50)
واحد
يصرخ
إقلب لمّا الموجز يخلص

أيوه استنى
"كاريوكا "بترقص
"زوزو" ويّا حبيب القلب
تسمع ضحك ولاد الكـ...ْ
موقف صعب
السِّت خلاص مش حِمل الهَزْ
مَعادتشِ الفُرجه عليها تلذ
البنت بتقلع
لجل تورى الناس
الرقص
قلب الأم بيرجف
وشفايف ناس ع القهوة بتنشف
بتحاول تبلع ريقها
تشرب ساقع لجل تدارى مشاعر

تكسف
صوت جوه القهوة بيصرخ
ياخوانا
مات "الشيخ" وف نفس الشهر
ماحدش سمى عليه
ولا حد قراله الفاتحه
صوت بيرد عليه ويقولله :
إتنيل واسكت
اللقطه آهى خلصت
قلّب شوف الموجة التانية
يمكن تلقى مشاهد تانية
مشهد تانى لنفس البطلة فْ نفس الفيلم
خللى بالك من "زوزو" قبل ما رقصت
غنت ... رقصت ... غنت

قالت ع الدنيا ربيع
صوت م القهوة بيسأل
وايش حال الآخرة يا "زوزو" ؟
صوت من بره القهوة بيدخل
يا خواننا
حد يلمَّع ؟
ولا حد يرد
طب حد يلمَع بالتقسيط ؟
ولا حد يرد
الراجل شال صندوقه ف إيده ...
وطالع بره
صاحبك جابه ف إيده وحط الجزمه
ف وشه
صاحبك جاى مبسوط ع الأخر

راجع نافش ريشه
جاى مش شايف حد قباله ...
وْقاعد يلعب
البنت اياها بترمى الدبلة ف وشك
وادتهاله
لازم يكسب
كل ما يرمى الزهر
بتسيبه عنيك
وتروح ع الجزمة
إتنيل والعب
صاحبك قفِّل كل خانات الطاوله لصالحه
كل قشاطه الأسود
غطى قشاطك لابيض
صاحبك لابس طقم جديد

عمرك يوم ما ح تلبس زيه
راكب "عربية" عيونها كبيرة ...
وْواسعة
أوسع
من عين البنت وهى بترمى فْ وشك شعرك
أكبر م الدنيا بتاعتك
اللى انت بترمى فيها همومك
ويّا مشاعرك
صحصح حبه
صاحبك دخل ورقه وسابك
عايز لسه تهز فْ خشبك
صاحبك قرب ياكل
سابك سارح منك فيك
قال للراجل صاحب القهوة

كل حساب القهوة عليك
صاحبك قام من جانبك
إنتهز الفرصة وغلبك
ساب فى عيونك دمعة حسرة
صاحبك فعلاً
أخّد العَشَرة


*******
"1 "" ناهيا" شارع يتبع بولاق الكرور " منطقة شعبية " بمصر
ويجاور منطقة راقية " المهندسين "
*"2"
كأس العالم للشباب 2001

القلب راح معاك وانت بتكتب دالكلام
ياريتني كنت صاحبك وكنت اسيبك تغلبني
يمكن بعدها يتغير كل الكلام !!

والعجب علينا إحنا لما ننسى
إننا لسه في اللعبه
وماحدش فينا غلب !!

تحياتي شاعرنا الرائع / علاء عيسى
ولله الحمد كنت أول المعانقين لحرفك بالشكر والتقدير

تحياتي

	الله على طوله بالك ياطويل البال الله يطول بالك كمان وكمان حيرت القلب معاك وتعبته مقدرش ف نص السكة يقعد ويقولى كفاية ولا يشغل باله معايا قلك خليه شغال شاعر بيطبطب على شاعر ماهو شارب نفس الكاس ومات م الحزن على نفس الكرسى فنفس القهوة مع نفس الناس وهو برضه بيشرب شيهشة وقاتلاه الانفاس وف جيبه مافيش التعريفة ومفيش غير حته تاليفة بيقول دا قصيدة لما نشرها فقاعه العامى هناك ف الوحة لقا عمه مصيلحى هناك بيقول ياعبيط بطل تنطيط او تكتب حاجه فيها تلخبيط حس انو عبيط وصغير ام شد حروفه وقام وهو عنده ف راسه الف سؤال مارضيش يسالهم ليلاقى جوابهم صواريخ او دان من مدفع طالع نيمان بيقول انا ناقد بتعاقد على طرح الشعر على ورد ان كنت تقولى ياسيدى على كوم من اوسخ تل زباله لو تعمل واحد او تعند ويانا شوف دمك قبل ماتكتب خيفيف يبقى اكتب تقيل قوم واشرب شاى على شيشة لتموت وفوسط الهبيشة وانا نفسى ماهوش على ادك مقاسى فى الشعر النونو ومكانى على ابعد مكتب فى المركز هقعد واركز واتنيل واكل عيش احسن ماكل على راسى بالجزمة واوعاك تزعل دا الحال من بعضه بيشد ف بعضه يبقى انت كمان هات ايدك ف ايديا نكتب ونغنى كلامنا تقولى جميل اقولك ياعظيم نتكلم من غير غيرنا مايسمعنا بشويش بشويش

	القلب راح معاك وانت بتكتب دالكلام ياريتني كنت صاحبك وكنت اسيبك تغلبني يمكن بعدها يتغير كل الكلام !! والعجب علينا إحنا لما ننسى إننا لسه في اللعبه وماحدش فينا غلب !! تحياتي شاعرنا الرائع / علاء عيسى ولله الحمد كنت أول المعانقين لحرفك بالشكر والتقدير تحياتي الفاضلة الكاتبة / عبلة سعدت بك جداً وأحمد الله أنك أول المعانقين لحرفى فالشكر لك تحياتى على ثناؤك على عملى المتواضع

الشاعر المبدع / علاء عيسى ...
تهرب الكلمات حياء أمام حرفك الطلي ..
عالم من الصور الجميلة تلاحقت ، أركض خلفها ، أتابع اللعبه ، تصيبني الحسرة .. الهث خلف الأحداث ولا تأتي النهاية ..
لا زال النص مستمرا .............

قالولي نور ..
يا ابني حنقفل ..
القهوة مهياش تكية
الحق اجري وراها
قبل ماغيرك ايكون وياها
والجيبة ما فيهاش غير جنهين
وربع اجنيه مخرومه
ما هو آخر الشهر يا شاعر
والبنت مش عايزه مشاعر
عايزه جيبه عمرانه ..
عربيه وكمان عماره
خشخش جيبك هيااتجيلك
صاحبك غلبك .. راح وسبقك
بالجري وراها ...

أعذر تطفلي ..
علمني كيف تكتب إحساسك أحرفا تتراقص ألما على صفحات القلب المثقل بالأيام .
تنساب نغما، يطرب يبكي .. ثم يسود الصمت .......

تحياتي ...................

و كأني أقرأ لوحة أو بالأحرى أشاهد لوحة مرسومة بيد فنان مبدع
و أنت بالفعل هكذا أخي علاء
فلشعرك مذاق خاص و الصورة فيه أحسها تماما من الشارع المصري
و أتخيلني و أنا أشاهد هذا المنظر المبدع على المقهى
اسألني انا و الواد دقدق في مقهى المهرجان
سلمت سلمت يا ابن البلد الأصيل
و تقبل ودي

	الله على طوله بالك ياطويل البال الله يطول بالك كمان وكمان حيرت القلب معاك وتعبته مقدرش ف نص السكة يقعد ويقولى كفاية ولا يشغل باله معايا قلك خليه شغال شاعر بيطبطب على شاعر ماهو شارب نفس الكاس ومات م الحزن على نفس الكرسى فنفس القهوة مع نفس الناس وهو برضه بيشرب شيهشة وقاتلاه الانفاس وف جيبه مافيش التعريفة ومفيش غير حته تاليفة بيقول دا قصيدة لما نشرها فقاعه العامى هناك ف الوحة لقا عمه مصيلحى هناك بيقول ياعبيط بطل تنطيط او تكتب حاجه فيها تلخبيط حس انو عبيط وصغير ام شد حروفه وقام وهو عنده ف راسه الف سؤال مارضيش يسالهم ليلاقى جوابهم صواريخ او دان من مدفع طالع نيمان بيقول انا ناقد بتعاقد على طرح الشعر على ورد ان كنت تقولى ياسيدى على كوم من اوسخ تل زباله لو تعمل واحد او تعند ويانا شوف دمك قبل ماتكتب خيفيف يبقى اكتب تقيل قوم واشرب شاى على شيشة لتموت وفوسط الهبيشة وانا نفسى ماهوش على ادك مقاسى فى الشعر النونو ومكانى على ابعد مكتب فى المركز هقعد واركز واتنيل واكل عيش احسن ماكل على راسى بالجزمة واوعاك تزعل دا الحال من بعضه بيشد ف بعضه يبقى انت كمان هات ايدك ف ايديا نكتب ونغنى كلامنا تقولى جميل اقولك ياعظيم نتكلم من غير غيرنا مايسمعنا بشويش بشويش أخى الصديق د / فوزى إن كانت قصيدتى جعلتنى أستمتع بنزف كلماتك فأشكر عملى المتواضع وأشكرك فى البدأ تحياتى

	الشاعر المبدع / علاء عيسى ... تهرب الكلمات حياء أمام حرفك الطلي .. عالم من الصور الجميلة تلاحقت ، أركض خلفها ، أتابع اللعبه ، تصيبني الحسرة .. الهث خلف الأحداث ولا تأتي النهاية .. لا زال النص مستمرا ............. قالولي نور .. يا ابني حنقفل .. القهوة مهياش تكية الحق اجري وراها قبل ماغيرك ايكون وياها والجيبة ما فيهاش غير جنهين وربع اجنيه مخرومه ما هو آخر الشهر يا شاعر والبنت مش عايزه مشاعر عايزه جيبه عمرانه .. عربيه وكمان عماره خشخش جيبك هيااتجيلك صاحبك غلبك .. راح وسبقك بالجري وراها ... أعذر تطفلي .. علمني كيف تكتب إحساسك أحرفا تتراقص ألما على صفحات القلب المثقل بالأيام . تنساب نغما، يطرب يبكي .. ثم يسود الصمت ....... تحياتي ................... إختصرت كلماتك احساس النص فأصبح قراءة أخرى له شكراً كاتبتنا " دخون " على هذا التجاوب مع نصى المتواضع وان كانت كلماتك تطفلا أشكر هذا التطفل وأتمنى أن لا ينقطع فهو لى شىء آخر

الله على طوله بالك


\


ألسنا آل بيت الصبر والصمت والصمود

	المبدع الحقيقى / علاء عيسى بانوراما إجتماعية وسياسية أستطعت من خلالها أن تقدم وجهى المجتمع بقدرة واقتدار ولعبت كقاص داخل المكان المجازى بكل مفرداته وقدمت شخصياتك البطلة والثانوية كأفضل ما يكون الإبداع قصيدة أراها مكتنزة وليس هناك ما يدعونا للصبر لأنها جاذبة