الإهداء
الى الأساتذة
النقاد ....
لكى تتاح لكم فرصة النقد .
فلابد من إتاحة الفرصة لنا للكتابة ...
أغسطس 2001
" عشرة طاولة "
خسرها علاء عيسى
الدنيا دواير
جوّه دواير من حواليك
والناس بتدوْر فى دواير
دايره بتخنُق فيك
تزهق وتسيب البيت
أو يمكن بيتك هوَّ اللى يْسيبك
تخرج
علشان هوّ الزهقان من قرفك
بتحاول تمشى ورا رجليك
لَجْل ما تهرب منهم فيك
الناس فى الشارع
زىّ الناس فى البيت بالظبط
لاتنين عايزين شويّة ظبط وربط
مصر دى خنقة
وابن الريف م الصعب علية يعيش
فى الزنقة
منهم لله
الناس فى الدار
ووْلاد الكار
قالوا لى الشعر فْ مصر يأكل عيش
فى كياس
ويلبِّس هِـدمه نضيفه وأحلى مداس
منهم لله ...
وْلاد الناس
ييجوا يشوفوا الشاعر ...
عايش بالتسليف
الشاعر
أكله وشربه شويِّة تصقيف
وإن زاد الجوع
يضّطر يْحُطّ الجوع
فى رغيف
شى لله يا مثقف
إيش حال التثقيف .. ؟
ياااه إتنهد
شاطر بس تقول :
الناس الأغنيا فقرا
وانت فقير المال ولكنك
أغنى الناس
قصدك إيه ..؟
شعرك .. ؟
حبة كلمات مرميه ف قلب ديوان !
بتعوض نقصك بكلام ؟
وللا بالصورة الألوان ؟
قوللى يا شاعر
مين راح يقرا ديوانك ..
غيرك
يمكن واحد صاحبك ...
يهديك إصداره القصصى
ويضطرك تقراه
علشان يقراك
ميت مرة أقولك :
حاول تمشى
الدنيا مش فردة جزمة ..!
لو طلعت واسعة ترجعها
حاول تحشى الجزمة بحاجه
حاول تمشى
يمكن تلحق تعمل حاجه
يااااه إتنهد
إياك فاكر بعد الشّرْ حَ تاخُد نوبِلْ
" شوقى ضيف" ما تكرَّمش فْ بلدك
"شوقى" إتكرَّم من برَّه
يعنى استنى
لمَّا الناس من بره تشوفك
يا كسوفك
مبسوط بالست الأكبر منك
بينها وبينك
راجل ميت
على حبة أحاسيس مرميه
فاكراك لسه مشاعرك حيه
أه لوكانت تعرف
إنك ميت من جواك
كانت تقفل بابها فْ وشك
زىّ البنت إيَّاها تمام
لمَّا بترمى الشعر ف وشك
يااااه إتنهد
يمكن آهه تنزل منك
تسحب روحك
تاخد أجلك
تاخد قضبان القطر معاك
ولْحَدّ ما توصل أوِّل شارع "ناهيا"* "1"
إستنى ..
بص هناك
صاحبك بينادى عليك
قاعد وسط الناس ع القهوه
ماسك زهر الدنيا ف إيده
وْقاعد يلعب
وانت تبص عليه
تستغرب
إزَّاى بسهوله بيرمى الزهر ...
وْيرمى قشاط الطاوله بسرعة
وانت ازاى بتعد بعينك
حاول تلعب
صاحبك كل ما يرمى الزهر بيكسب
وانت تبص عليه تتحسر
كل الناس حواليك كسبانه
وانت "الدُش" معاك بيخَّسر
إتنيل والعب
صاحبك مبسوط ع الآخر
باسط كل الناس ع القهوة
باسط حتى الراجل صاحب القهوة
كل شويه يوصى ييجى لنا
شاى على قهوة
وأنا جيبى مش حِمْل القهوة
وما فهْش غير جنيهين
زائد ربع "جنيه" مخروم
ماحنا ببقينا ف نص الشهر
هُمّا فى جيبى وكل فلوسى
كان ممكن أرمى جواب التعيين ع الأرض
وافتح شركة كبيرة
واعمل ثروة كبيرة
واعين كل الناس
بفلوسى
كنت ساعتها
ممكن احزِّم كل بنات البار
بفلوسى
واتجوز أجمل بنت
لكن خفت
البنت تكون عايزانى
بس عشان تعيش بفلوسى
كان شرط علىَّ
إنى أقول للراجل صاحب الشغل
إنى فى صباعك خاتم
وإنه لوحده ف كفه
والكفه التانيه لكل العالم
بسّ رفضت
وقبلت ابقى موظف
دخلى بسيط وأعيش ويَّا الناس البسطا
بس فوجئت
البنت الأجمل بنت
بترفض عيشتى بعد ما راحت كل فلوسى
والواد بياخدها ف إيده ونازل
رقص
إتنيل والعب
صاحبك مبسوط ع الأخر
ماسك زهر الطاوله ونازل
قرص
صاحبك قرَّب ياكل
قفِّل كل خانات الطاوله لصالحه
صاحبك فعلاً أخد الدور
صحصح حبه
صاحبك غلبك
واحد مَرْس
صاحبك فرحان ومزقطط
نغمة "سحرانى" ح تخرم ودنك
خَّد محموله ف إيده
وإستأذن منك
صاحبك قالك :
جهِّز نفسك
ح أطلع بره ح رد عليها
ثوانى راجع لك
تطلع عينك بره القهوة تبص لصاحبك
عينك تلمح بنت بتسبق
واد بيحاول يمسك إيدها
البنت بتشبه نفس البنت
اياها
كان ممكن أعمل راجل
يوم الليله اياها
وأنا شايف إيده بتسحب
تمسك إيدها
كان لازم أقطع إيدها
لمَّا عرفت انها
ساكتالُه
كان لازم أكشف كل الكدب
قُباله
لجل ما يعرف ..
إن حبيبته قبل ما ييجى بتبقى حبيبتى
كان لازم واحد فينا يضحِّى
ويمثل دور النايم
لجل التانى يعيش
أراجوز
كان ممكن أبقى التانى وافوز
واتنرفز
لكن خفت الليلة اياها تبوظ
فَضَّلْت أشرب شاى على روح التانى
واسيب الملعب كله
وادوَّرعلى ملعب تانى
مافهش واحده كدابه
وْ واحد زيّى جبان
على واحد زيُّه بيفرح
لمَّا الناس بيقولوا عليه
محظوظ
صاحبك بيكلم فيها
فرحان ع الآخر
وانت بتسرح
والأزهر صوته بيعلى
يدخل ودنك
عينك تدخل جوه القهوه
تْبُصّ عليه
الأزهر مبسوط ع الآخر
جاهز يقبل أى تبرع
نفسه يراضى كل الفقرا
حاجه تزهَّق
كل شويه الموجز يبدأ
"عبد الله" و"بشار" فى الصورة
و"الريس" بينهم
زى الأب . وسط ولاده
وقت الفرح ووقت الشده ...
بْيبقى ما بينهم
عايز يعمل حاجه لحد
بس بشرط
إن الحَدْ ما يكونش يهودى
"الريس" زعلان ع الآخر
متضايق م الوضع الراهن
صوته بيوصل كل العالم
شايل هم الكون على وشه
"بوش" بين "عرفات" و"شارون"
ومرّكِّب وشِّين على وشُّه
عايز يعمل حاجه لحد
شرْط يكون الحد يهودى
"أمريكا" بتلعب لعب كبير
والماتش مولَّع بين الاتنين
"مصر" بتكسب
والماتش بيخلص
صفر - (2)*
واتنين م القدس بيرموا أرواحهم
جوّه ميدان ويموت (50)
واحد
يصرخ
إقلب لمّا الموجز يخلص
أيوه استنى
"كاريوكا "بترقص
"زوزو" ويّا حبيب القلب
تسمع ضحك ولاد الكـ...ْ
موقف صعب
السِّت خلاص مش حِمل الهَزْ
مَعادتشِ الفُرجه عليها تلذ
البنت بتقلع
لجل تورى الناس
الرقص
قلب الأم بيرجف
وشفايف ناس ع القهوة بتنشف
بتحاول تبلع ريقها
تشرب ساقع لجل تدارى مشاعر
تكسف
صوت جوه القهوة بيصرخ
ياخوانا
مات "الشيخ" وف نفس الشهر
ماحدش سمى عليه
ولا حد قراله الفاتحه
صوت بيرد عليه ويقولله :
إتنيل واسكت
اللقطه آهى خلصت
قلّب شوف الموجة التانية
يمكن تلقى مشاهد تانية
مشهد تانى لنفس البطلة فْ نفس الفيلم
خللى بالك من "زوزو" قبل ما رقصت
غنت ... رقصت ... غنت
قالت ع الدنيا ربيع
صوت م القهوة بيسأل
وايش حال الآخرة يا "زوزو" ؟
صوت من بره القهوة بيدخل
يا خواننا
حد يلمَّع ؟
ولا حد يرد
طب حد يلمَع بالتقسيط ؟
ولا حد يرد
الراجل شال صندوقه ف إيده ...
وطالع بره
صاحبك جابه ف إيده وحط الجزمه
ف وشه
صاحبك جاى مبسوط ع الأخر
راجع نافش ريشه
جاى مش شايف حد قباله ...
وْقاعد يلعب
البنت اياها بترمى الدبلة ف وشك
وادتهاله
لازم يكسب
كل ما يرمى الزهر
بتسيبه عنيك
وتروح ع الجزمة
إتنيل والعب
صاحبك قفِّل كل خانات الطاوله لصالحه
كل قشاطه الأسود
غطى قشاطك لابيض
صاحبك لابس طقم جديد
عمرك يوم ما ح تلبس زيه
راكب "عربية" عيونها كبيرة ...
وْواسعة
أوسع
من عين البنت وهى بترمى فْ وشك شعرك
أكبر م الدنيا بتاعتك
اللى انت بترمى فيها همومك
ويّا مشاعرك
صحصح حبه
صاحبك دخل ورقه وسابك
عايز لسه تهز فْ خشبك
صاحبك قرب ياكل
سابك سارح منك فيك
قال للراجل صاحب القهوة
كل حساب القهوة عليك
صاحبك قام من جانبك
إنتهز الفرصة وغلبك
ساب فى عيونك دمعة حسرة
صاحبك فعلاً
أخّد العَشَرة
*******
"1 "" ناهيا" شارع يتبع بولاق الكرور " منطقة شعبية " بمصر
ويجاور منطقة راقية " المهندسين "
*"2"
كأس العالم للشباب 2001