أنا جايلك

أنا جايلك


اقولك سرك المكنون
وافضفضلك
من القلب اللي مش بيخون
وهاضحكلك
واخلي الدنيا تضحكلك
وهافتحلك قلوب
الناس
وهالبس توبك الميت
وازوغ من هجمة الحراس
واغنيلك
وهاكتبلك
كلامك سحرك المجنون
انا مفتون
وبعشق نيلك المسكون
وهاطلع في السما السبعة
واجيبلك حتة م الجنة
وهاتمنى
وهارسم قلبي بالحنة
وهانده كل عشاقك
وهاحكيلهم عن الحب اللي يتغنى
عن الفجر اللي يستنى
عن النور اللي مش بيكون
واقولك نص احلامي
واكونلك نصك التاني
وبرضه عساكر الضلمة
تموت فينا من تاني
ودفترهم محضرلي
عشان حبك متين تهمة
خلاص ولا عدتي سامعاني
خلاص روحك
بتنساني
وانا والدمعة لقياني
وببكي ع الحيطان
أرسم مراسم دفن
وحراسك بينفوني
وكل يومين وع القلعة
وكرباجهم على
جسمي مولع
جلدي ميت ولعة
وما بيخف
وانا في حبك
بقول هانت
واضمد جرحي
بالضحكة واقول
بكره الجروح تنشف
وكل هلال بغنيلك
بناديلك
واوريلك على
ضهري اثار النفي
وادور في البيوت
ارسم حروف الضي
واعد الشق في كفوفك
وبشرب همي من جوفك
ومالك زي
وبلمح طيفك السهران
يعدي يكفن الميت
وحتي الحي
وكل يومين
افتش في النهار
عنك
وبندهلك
انا منك
انا النقطة اللي
تايهة جوه ملكوتك
انا سكوتك
في عز الدنيا ما تنبح
كلام الزيف
انا الضحكة
في وسط الكدب
والتخريف
انا موتك
لو اخترت
يفور دمي
على ترابك
سنابل قمح
أنا دموعك
ولون النوح
على دروعك
ويأسك
لما تتوضي
حطام الرمح
انا الذنب
اللي تكفيره
تشوفي الفجر
ونتواعد
ولما القاكي
في الضلمة
أنام واصحى
وعند لازوغلي
نتباعد
ونتقابل على جبينك
ف حوش الليل
وتحت السلم
اللي بيجمع العشاق
وبحكيلك
عن الغربة
اللي بتوسوس
خلاص عمري
وأنا عمري
ما هافتح
قلبي للسخرة
وهالضم ذلي
في سكوتي
بخيط موتي
وأعلقلك
حجاب الصمت
ونوح الليل
على نيلك
مع المووايل
بتتحاكى
بتنده
من بعيد
ع الفجر
وحلم بسيط
يكون بكره
في ليلة قدر
تكون الضحكة
مرسومة
على وشك
تمام البدر
ويحميكي
في وسط
العتمة
م الصقر
اللي ناوي
الغدر
ونتقابل
على
بحرك
اشوف سحرك
وترقيني
بنسيم الضهر
وتيجي تحلي
من كتفي
ومن صدري
عهود الندر
خلاص جايلك
أكيد جايلك
اعدي سورك
الضلمة
واصحيلك
عيون الفجر

21/2/2006
شعر
محمد كارم

انا المفتون بهذا الابداع السامق

احمد الله انى قد سعدت بالمقعد الاول
لارحب باخى وحبيب قلبى الشاعر

محمد كارم
لارحب به

مرحبا مرحبا
بك اخى الحبيب
ويبدو اننا على موعد بالاستمتاع الحقيقى لشاعر يتمكن من ادواته ايما امتلاك
وتسكنه الموهبه ويسكنها
تحياتى لك مبدع واخ وصديق حميم
اسعدنى تواجدك معنا وسط هذه النخبه السامقة
تحياتى القلبية ومودتى

رائع
نبيل مصيلحي

انا النقطة اللي
تايهة جوه ملكوتك
انا سكوتك
في عز الدنيا ما تنبح
كلام الزيف
\

نص باهر
وشاعر ... ساحر