فتــــانة

وانا طالع للدور التاني
شفت الحلوة اللي شاغلاني
كانت قاعدة مع صاحبتها
أول مرة تزورها فبيتها
واول مره أحس بقلبي
واعرف إيه اللي فيه متخبي
وردة حب كانت دبلانه
وروتها اللفتة الخجلانه
ونور بيشعشع من عينيها
وبساتين خد بتنده فينِك
يا وردة ناسية ومش ناسيينك
ايه رأيك لو جيتي معانا
وانتي بعيدة العمر مضلِّم

عالسلِّم شفتها عالسلِّم
يتغرد قصدها تتكلم
وانا طالع للدور التاني
دقات قلبي شوق وأغاني
سألت عني..قالت صاحبتها
جاري لكن مش دي عوايدو
كان كل ما بيفوت بيسلم
مشغول أو إنّ الهوى قايدو
ياجارة اللي يشوف ياما يبلّم
ودخلوا الشقة..ويا الرقة
وقبل ما اقوللو آه أو لأَّ
لوحدو القلب حضنها مسلم

حبيتها أيوه انا حبيتها
ولابد اعرف فين سكتها

لو نجماية فوسط سمايا
أفني العمر سهر وليالي
لو دا خيال وهيا حكاية
أنسى الدنيا واعيش في خيالي
لو دره ومسيرها لبحر
غرقان لو حن موج ورضالي

***

وقت الهنا أنا باترجاك... تستنى على بال ما أخْلَص
ملكلمتين اللي خطروا...على بالي لما تمادى وبص

آه م العيون اللي رأيتها
سود الليال شكوا نظرتها
والشعر توّه وسادتها
والبدر شافها قال بانقص

فيه وحده نورها زاد عني
والزهر قال مين يطمني
شميت نسيم مش جي مني
وحرف الغزل هايم في النص

استنى قرّبت أخلّص
على فين يا من اللولي فص

فتانة وجمالك سراق
والعمر للأيام مشتاق
واتفضلي شهد الأوراق
الورقة دي نهايتها القص

فداكي لو كان بإديكي
اتبعترت انا قبلها بيكي
ويلمني وصل عنيكي
موعود لو حبك أخلص

امتى وفين الساعة كام
كاتب كلام ولا في الأحلام
وعبيرك الفواح ياسلام
وقت الغروب..
يحلى الغرام..
وعالشط دا هوا المرام
ونبدأ حياتنا من جديد
فرح وغنا ومن الهنا
سنة بسنة الشوق يزيد
حظي أنا مش حظنا
يابسمة من نالها سعيد

أهزوجة رائعة
تخيتها أغنية خالدة لعمالقة الطرب
كلمات تحمل شحنة عالية من الموسيقى التي تطرب القلب
ومن الحياة التي تؤانس الروح
رائع أيها الشاعر
ننتظر المزيد من هذا الجمال
مودتي

غنائية جميلة تطرب لها النفس وتستصيغها الذائقة
أبدعت شاعرنا
وننتظر المزيد من يراعك الفريد
خالص التحايا

قصيدة غنائية خفيفة
الروح وجميلة الابداع
تحياتي ونتمنى المزيد من الابداع الجميل الهادف
دمت مبدعا شاعرنا يسلم جميل