مقاطع مني ...
( بصمة )
كل الكلام منقوش على كفي
بصمة ايدية معني ... بيكفي
نظرة عنية تقول .... وتوفي
انا رغبتين !!
تديني حقي .....وأقول بحريه
لو تلج نازل ....الحرية بتدفي !!!
-----------------
( تصريح )
آنا مش قيس وانتي ليلي
مش شهيد فى الحب انا
والحنين مش بالمحايلة
ولاّ حبة مسكنة
لو تجيني هتلاقيني
جنة حلوة ملونة
وان هجرتي عادي جداً
مش رح أعمل محزنة
-----------
( نظرة )
النظرة بتعاني الخجل لعيونك الخضرا
والحلم راسم قُبل تحت الشجر مطرا
وانا قلبي فارس غزل حلمي فرس صحرا
ماملكش غير قلمي وبشرتي السمرا
وانت الاميرة ابنة الامرا
مش ذنبك ان الحياة رقصت على جبينك
ولاذنبي اني اتولدت واحد من الشعرا !!!
---------------------
( سؤال )
ومين عرف لدق القلب مشوارك
ومين اللى رمي قلبي فى تيارك
ومين ياوردة عرفني بأزهارك
ومين ياميّة عطّشني لانهارك
ومين يسعفني يوصفلي طريق دارك
قوليلى مين ؟؟!!
------------------
( عاشق )
انا العاشق
ومين يقدر يعلم قلبي
كيف يعشق غناوي الليل
ياغنوة صيف فى موالي
أنا اتعلمت من عشقك
أحبك .. وأعشقك تاني !!!
---------------
حلمى عمر