إنشا الله القيامه تقوم .. مساجلة شعرية .

إن شا الله القيامه تقوم .. مساجلة شعرية:
هجرته حبيبته وتزوجت بآخر .. رفع كلتا يديه نحو السماء وقال ( يا رب القيامه تقوم الآن وفوراً ..) ..التقط الموضوع الشاعر حسن الزبير وقال بلسان العاشق :
إن شا الله القيامه تقوم
عشان ريدك معاي ما يدوم
ناس سهرانه طوالي
وناس طول الليالي تنوم
أشوف أنا كيف حسابك يطول
علي الوعد الدوام ممطول
وأنا الشايف كتير أحباب
يعيشوا الريده عرض وطول
أنا الشايل دوام همك
واريدك ريده زي أمك
واغير من غيرتي ذاتا عليك
إن شا الله القيامه تقوم
وكل زول يمشي في حالو
عشان ما قلبي يرجع يقول
حبيب الدنيا في بالو ..
رد عليه دكتور شادول وهو طبيب وشاعر :
إنشا الله الحساده تطير
وتمتد السعاده تدوم
والضاق العذاب في الحب
بكره يعيش ويشبع نوم
وتقول القيامه تقوم ؟
عشان حظك شقي ومشئوم
أنحنا لا عرفنا الريد
ولا متلك عشقنا الغيد
وحبينا القريب وبعيد
ولا ضمانا حضن النيل
مع الوجه البهي وغّريد
ولا للليل شكينا حبيب
ولو أن العشقنا عنيد
ولا سطرنا في الخلوات
غُنا وموال .. درر وقصيد
لا الصابر ولا الباكي
خيالك عندي يوماتي
صباح خيري ومسا افراحي
وسهري معاك صبّاحي
عيونك فوق عيوني تنوم
وفوق آلامي ترتاحي
وحبك من عواتي الريح
ألمو وأضم علي جناحي
نأكل حب
نشرب حب
ونلبس حب
وإنشا الله الحساده تطير
وتمتد السعاده تدوم
وتتمني القيامه تقوم ؟!!
رد عليه حسن الزبير :
إن شا الله القيامه تقوم
وعشمي في الله ما شويه
أدخل جنة المأوي
هناك يعطوني حوريه
أتكي في الأرائك أنوووووم
بكل حبور وحريه
وارتاح من ده مافي وقوم
أفارق دنية المعدوم
وألقي مطالبي بالنيه
ولو حنيت للحم الطير
تجيني الطيره مشويه
عشانك كيّه يا دكتور
تكون حوريتي خمريه
ولهجتا خالصه عربيه
أخلي ليك بنات حواء
تعاني صباح وعصريه
وتبقي عواطلي يادكتور
هناك لا مرضي لا شكّيه
هناك حتي الرحيق مختوم
وولدان طايفه دوريه
لا عشوائي في الخرطوم
ولا صفقات تجاريه
وان شا الله القيامه تقوم
وننجح ميه في الميه .
رد عليه دكتور شادول :
ما مقبوله أعذارك
وما معروف مصيرك وين
وما هي صالح أعمالك
عشان يعطوك حوراً عين
ولو إنتا .. في الصراط ماشي
ولوحوا ليك ببنيه
حتختل كل حساباتك
وتسقط سقطه أبديه
أما لو ضرب حظك
وجابوا ليك بنات الحور
تموت واقف علي طولك
يخونك حيلك المشلول
وتتلفت يمين وشمال
مشدود بالجمال مبهور
وتحتار باقي عقلك طار
في من يهوي أو يختار
ديكا قواما سمهر وطول
وديك دعج العيون مكحول
وديكا جمالا يسبي عقول
وديك خليها لشادول
وديك شعراً كمان خلي
قدر ما يزيد نعومه وطول
تقيف مشدوه ..
وتفوت القيامه عليك
تتلفت طرب وذهول .

الله ما أجمل رد الدكتور شادول
رد ذكي وفي مكانه

دمت بخير أبت

الله ما أجمل رد الدكتور شادول
رد ذكي وفي مكانه

دمت بخير أبت

الأستاذة ربيحة الرفاعي
تحية طيبة
حين أطلاعي على هذ االبوست كنت أستغرب بيني وبين نفسي لجلب أستاذنا عبدالغني لهذا الشعر العامي الى هذا المنتدى بحساب ان كثيرين من اعضائه لن يقفوا على معانيه المختبئة في العمومية لإختلاف البيئة والنقاط التي تفضي به الى الفهم السليم ، ولكن بمداخلتكـ هذه إنزاح إستغرابي وعرفت أن الوالد عبدالغني أثقب ذكاءً في قراءته لكم ....
أستاذنا عبدالغني من الأدباء الذين لا يحفلون بحدود الجغرافية والإختلافات اللغوية في اللسانيات (وهو في هذا محق) فيطفق ينشر أعماله باللغة العامية في منتديات غير سودانية وجل أهلها من الناطقين بغيرها (أعني لغتنا العامية التي لم يطلع عليها الأخرون) .... لكن الادب لايعرف موطناً معيناً فحينما نشر الطيب صالح روايته موسم الهجرة للشمال بنفس احاديث أهالي الشمال العامية ونفس محاوراتهم وعاداتهم لم يكن يتخيل أن تصيب هذه الرواية هذا القدر من الإقبال والقبول العالمي ، وكذلكـ حينما ترجمت الروايات المكسيكية والغربية ونقلت للعربية لم يكن من المتخيل ان يطالها كل هذا الإحتفاء بأعتبارها تؤسس لثقافات ودنيوات وعوالم غير تلك التي تالفها المنطقة العربية .... وهو ضرب سبق العولمة بسنوات بل أنه من العناصر المؤسسة للعولمة في قوالبها الأخيرة وبمفهومها السائد حالياً .... وهذا نتاج للجرأة والقوة في الطرح ونصاعة الفكرة رغم إختلاف المواعين والآليات والمنافذة المستخدمة ...
حقيقةً أنا سعيد بان تحظي مساجلات الشاعر الراحل حسن الزبير ورفيقه شادول بهذا القبول منكـ وسعيد بان أتعلم من أستاذي عبدالغني كل يوم قدرته المذهلة في سبر اغوار الإبداع السوداني ونقله لحدود أخرى غير مالوفة بالنسبة للإبداع السوداني أو هكذا يخيل لي
اشكركـ واشكر العم عبدالغني على تجلياته وفيوضاته الباهرة ، والمغفرة والرحمة لشاعرنا الراحل حسن الزبير


يوتيرن :- خطأ لغوي صاحب النقل في كلمة إن شاء الله حيث يدمج كثير من الناس بين الحرف إن و الفعل شاء في كلمة واحد لتصبح إنشاء بمعنى خلق وهو خطأ مشاع درج الناس عليه في أكثر من موقع ، وأنا كثيراً ما يلفت نظري لانه يتعلق بامر من صفات الإله (تعالى الله ان يُنشا) وهو الناشيء لكل شي ... وأشكركم على التفهم لهذا الملاحظة الصغيرة ، رغم أنني أكثر الناس وقوعاً في الاخطاء اللغوية والإملائية
لكم أحتراماتي الزائدة