يوميات سائق عربة أجرة ( 1 )

بسم الله الرحمن الرحيم
يوميات سائق عربة أجرة (1 )
عبدالغني خلف الله
أصبحنا وأصبح الملك لله ..شربت الشاي والقهوة وتوجهت في طريقي نحو السوق العربي باكراً علي غير العادة حتي أعوض خسارة فقداني للجوال الذي سرقه مني زبون علي طريقة السينما ..جاء حاملاً حقيبة ثقيلة وطلب مني أن أنقله مشوار ..وبعد الإتفاق علي الأجرة ..فتحت الباب الخلفي لأدخل حقيبته تلك وعندما عدت له وجدته قد اختفي ومعه الجوال خاصتنا والذي كنت أضعه علي ( الطبلون ) ..وما أحزنني أنه ضحك عليّ وحرمني من وسيلة التواصل مع زبائني ..وكلفني مشوار لتسليم الحقيبة للشرطة وعندما فتحوها وجدناها وهي تنوء بالحجارة ..الشاويش قال لي ربنا يعوضك .. بعد أن علم بالقصة ..عدت أدراجي للموقف وما أن توقفت حتي تقدم نحوي اثنان من الشباب ..مرحبا .. ممكن تودينا مشوار جنوب الخرطوم ..ممكن طبعاً ..بكم المشوار ؟ ..مائة ألف جنيه ..كم ؟!! ..مائة ألف جنيه ..؟!!!..يا شباب بين سيد البضاعه والمشتري ..يفتح الله ويستر الله .. ما قلنا شيء لكن هذا المبلغ كثير جداً علي هكذا مشوار ..والله يا شباب أنا كلمتي واحده ..(سيبك منو ده واحد جبان )هكذا وصفني أحدهم لرفيقه ..ومن ثمّ انصرفا ..تقدم نحوي بعد حوالي نصف ساعة انتظار شخص وزوجته فيما يبدو ..يا أسطي ممكن تأخذنا مشوار جنوب الخرطوم ..ممكن طبعاً.. بكم المشوار ؟ ..مائة ألف جنيه ..أنت تمزح ولا ريب ؟ ..بالطبع لا أمزح ..التفت نحو زوجته وهمس في وجهها ..(سيبك منو ..ده واحد جبان )..فكرت في تناول شيء من الكافتيريا القريبة من الموقف في هذا البرد القارص ..فتقدم نحوي رجل في العقد السادس من العمر ..يحمل كمية كبيرة من الكتب ..يا إبني ..يا إبني ..مشوار إلي معرض الكتاب بالخرطوم شرق..؟ ..ممكن طبعاً فقط أمنحني خمس دقائق أتناول خلالها شيئاً من الطعام ..والمشوار بكم ؟ ..سنتفق عليه لا حقاً ..لا تحمل هماً ..وأنا أيضاً أشعر بالجوع ..إذن هيا بنا ..فيم الانتظار . ..لكن هل ندع الكتب هكذا خارج العربة ..يا أستاذ لا تخف عليها ..هل سمعت بلص يسرق كتاباً أو يسطو علي مكتبه ؟ ..تعال ..تعال ..أؤكد لك أنها لو مكثت بمكانها عاماً كاملاً لن يلمسها أحد ..وفي الكافتيريا دردشنا أثناء تناول الساندوتشات ..سألته عن سبب ذهابه لمعرض الكتاب ..والله يا إبني قمت بطباعة الكتاب هذا قبل خمسة أعوام لم أوزع منه غير خمسة نسخ فقط ..وما موضوع كتابك يا عماه ؟ ..الكتاب حول ( هموم العصر الحديث ) ..ويتحدث عن الصراع بين الإنسان والحضارة في إطار المنظومة الجديدة للقيم المجتمعية السائدة بعد ظهور العولمة والحداثة ..طبعاً لم أفهم أي شيء .. قلت له والله هذا كلام جميل ..ربنا يوفقك ..وعندما عدنا للعربة وجدنا ربطة الكتب سليمة لم يلمسها أحد ..قلت له ..(جالك كلامي) ..الكتب كما هي .. .. لو كانت ربطة أحذية لما عثرنا لها علي أثر ..غضب من كلامي هذا وقال لي في انفعال ظاهر ..كيف تتجرأ وتقارن الكتب بالأحذية ..هذه أهانه للمعرفة ..طيبت خاطره وحملته حتي المعرض ..منحني خمسة ألف جنيه وهو يعتذر ..شكرته ..وعدت أدراجي نحو السوق مرة أخري ..خمسة ألف جنيه ؟! ياما أنت كريم يا رب .وحتي جديد اللقاء مع يوميات جديدة أترككم في رعاية الله وحفظه .

يومية ماتعة ...لاتخلو من العبرة
لمن أراد أن يعتبر أو يتذكر
تنقل للمنبر المناسب

عزيزي أحمد ..سعدت بوجودك هنا ويسرني إهداؤك الحلقةالتالية :
يوميات سائق عربة أجرة ( 2 )
عبدالغني خلف الله
أصبحنا وأصبح الملك لله ..نهار الأمس اكتشفت أن عربتي خالية تماماً من المساحيق و(الاكسسوارات ) وكأنها في حالة حداد ..فكرت في الذهاب للمحلات المتخصصة بتجميل العربات ..يعني ..قماش جديد للمقاعد ..وضع هوائي بالجانب الأيمن ..كتابة شيء من الأقوال المأثورة أو وضع معطر حول المرآة الأمامية أو أي شيء من هذا القبيل ..لأن بعض الزبائن يعشقون العربات الأنيقة ونسبة لأن الناس ومع الضائقة المعيشية تفضل المركبات العامة وهي تندس في ثنايا الأجساد المحشوة بداخلها تتنفس الغبار ودخان التبغ ورائحة العرق ..وهجرت عربات التاكسي ..أحد الزملاء نصحني بالذهاب إلي فنان وخطاط وصاحب محل متخصص في مثل هذه الكماليات التي لا أجدني مقتنعاً بها لكن أحياناً تضطرك قوانين العرض والطلب لفعل ذلك .. وصف لي دكان وقال لي أسأل من واحد إسمو ( شخبته ) .. خطاط وفنان وعندو كل مستلزمات (الكشكشه) ..إنتهيت من تناول وجبة الإفطار التي أحرص علي تناولها في الوقت المحدد ..تجد ناس يفطروا الساعه الواحدة ظهراً ..حيستفيدو شنو ؟ والأكل علمياً يتم هضمه في أربعة ساعات ويتحول إلي طاقة بعد ساعة كاملة من عملية الهضم ..الكلام ده سمعتوا مرة من طبيب أخذته في مشوار حتي عيادته الخاصة ....وصلت صاحبنا ( شخبته ) قال لي أي خدمه ؟ ..قلت ليهو والله يا أستاذ وصفك لي صديق عزيز وقال العربيه تطلع منك صوره وصوت كأنها في مهرجان ..نزل من كرسي طويل كان يجلس عليه ..قال لي أول حاجه خليني ألقي نظره علي العربيه .. اللون الأخضر التركوازي هذا يحتاج لأكسسوارات بنفسجيه وبيجيه .. عرض عليّ لي كذا حاجه وطلب مني أن أختار منها ما يعجبني .. قلت ليهو إنت اتصرف وأنا استلم العربيه علي ذوقك ..اشرب لي شاي وأجيك راجع .. قال لي يعني اتحرك في حدود كم كدا ؟ ..قلت ليهو لغاية مية ألف جنيه ..قال لي المبلغ ده ما بظبط ليك العربيه لكن ما في مشكله ما زاد يبقي لينا عندك ..رجعت بعد شرب الشاي وبالكاد تعرفت علي عربتي من كثرة الأشياء التي ألصقها بها .. .. قال لي في شيئين ضروري أخذ رايك فيهم ..صور الفنانات ..والكلام المفروض يتكتب .. يلا ورينا .. دي صورة نانسي عجرم ..وعكرم دي تطلع شنو ؟ ..نانسي عجرم يا خال ..في زول ما بعرف نانسي عجرم ..قلت ليهو والله مش بطاله .. كدي نشوف حاجه تاني ..قال لي دي صورة هيفاء ودي شيرين ودي السا .. زولك لخمني لخمه ..قلت ليهو .. أنا زول كبرت علي الحاجات دي شوف لي صورة الكعبه .. او منظر طبيعي .. حاجه من النوع ده ..شنو البوديني لعكرم ولسه ..إسمها إلسا يا خال ..قلت ليهو ولو ..طيب نكتب ليك شنو ..زي شنو يعني ؟ ..دي عباره بتقول ( التش تش حلاوه لبن ) ..وتاني .. دي بتقول ( شذي وبس ) ..وشذي دي تطلع منو ؟ .. شذي إسم بنت .. وتاني دي عباره بتقول ( علي كف القدر نمشي ولا ندري ما المكتوب ) ..المهم عرض عليّ عدة صور وجمل مطبوعة بطريقة أنيقه .. عربي وافرنجي .. قلت ليهو يا استاذ خلصنا واكتب لي ( تحذير ..وقوف متكرر ) ..اصلي معجب بهذه الجمله .. قال لي لكن دي للحافلات وبس .. طيب ..صلي علي النبي يا معلم ..ألف صلاه علي الحبيب .. اكتب لي ( هذا من فضل ربي ) ..انتهيت من (الكشكشه ) وطلعت من المحل وأنا ما مصدق الشكل الجديد لعربتي .. ومع أول منعطف أوقفوني ثلاثة أشخاص هيبه كدا ..قالو لي نريدك في مشوار ..قلت لنفسي (خلي بالك الكشكشه أثبتت جدواها )..ما عندكم مشكله يا شباب اتفضلو ..واحد ركب بالمقعد الأمامي والإثنان بالمقاعد الخلفية ..علي وين كان الله هون ؟ ..علي واد مدني ..نعم ؟! ..واد مدني وادمدني ؟ نعم وادمدني عاصمة ولاية الجزيرة ..عندنا شركه لاستيراد العربات وعاوزين نعمل ( بروباقندا ) ..وحنعطيك ثلثمائة ألف جنيه ..أها قلت شنو ؟ ..قلت موافق طبعا ..أخذوني بطريق جانبي وبعد مضي نصف ساعة تقريباً وضع أحد الراكبين بالمقاعد الخلفية مسدسه في رقبتي وأمرني بالتوجه نحو شاطي النهر أنزلوني وأوثقوني بالحبال ورموني في حفرة عميقة بعد أن أخذوا الجوال وانطلقوا بعربتي وهم لا يلوون علي شي .. وقبيل الغروب حضر شاب ليستحم في النهر ..سمع أنيني بعد أن بح صوتي من كثرة الصراخ طلباً للنجدة ..توجهت مباشرة نحو مركز الشرطة لأجد عربتي قابعة في باحة المركز ..الشرطة أخبرتني بأن من أخذوا عربتي عصابة شرعت في نهب أحد المتاجر بالسوق لكن الناس تجمهروا حولهم ومنعوهم من الهرب لحين حضور الشرطة ..استلمت عربتي والجوال وطيران علي منزلي .. حمدت الله كثيراً علي نجاتي من هذا المأزق الخطير ..وحتي جديد اللقاء مع يوميات جديدة أترككم في رعاية الله وحفظه .

سرد رائع ليوميات من محطات الحياة
ماتع الأسلوب الذي يتخلله الحكمة والموعظة
أديبنا الفاضل ..
متابعة لكم هنا
تحاياي

السلام عليكم ورحمة الله

استاذنا الفاضل

يوميات تشرح وضع مجتمع بطريقة فيها شئ من الطرفة

منتظرين لباقي المحطات

تقبل مروري وتحيتي

أحبتي آمال وعايد .. شكراً لانضمامكم لمشاويري وإليكم الحلقة التالية :
يوميات سائق عربة أجرة ( 3 )
عبدالغني خلف الله
أصبحنا وأصبح الملك لله ..حان موعد سداد قسط الجامعه لأحد أبنائي لذلك لا بد من العمل ليل نهار لمقابلة التزامات العائلة التي تتساقط عليّ كالأمطار ..في الأيام العادية عندما أكسب مبلغ مائة ألف جنيه أكون في غاية السعادة أكثر من ذلك المبلغ يجعلني أقرب للجنون ...طلعت الشارع أشروا لي ثلاثة شبان ..صباح الخير يا معلم ..أهلاً وسهلاً ..ممكن تودينا مشوار ..طبعاً يا شباب أتفضلوا ..إلي أين كان الله أراد الخير ..؟ والله لا نعلم بالتحديد .. أتصل بنا شقيقنا وأخبرنا بوفاة جدنا وأنهم تحركوا بالجثمان لدفنه ..لكن فات علينا سؤاله عن المقابر التي سيدفن بها المرحوم ..قلت لهم ظاهرة المعلومة الناقصة هذه وصلتكم أيضا ؟! أنتم شباب صغار السن فماذا يشغل بالكم لهذه الدرجة ؟ .. رد عليّ أحدهم بأسيً شديد ..قل لنا أنت ما هو الشيء الذي لا يشغل بالنا ؟ .... ..لكن الموضوع بسيط نبدأ بمقابر حمد النيل ومن ثمّ مقابر شرفي ومن مقابر لمقابر حتي نجدهم .. ..لكن هذه الجولة تتطلب الاتفاق علي المشوار يا شباب ..ودعوني أقول بأنني سأكون تحت تصرفكم حتي الساعة الثانية عشرة ظهراً ..إتفقنا..؟ إتفقنا ..وسنعطيك مائة ألف جنيه ..موافق ؟ ..نعمه من كريم ..بسم الله وحسبنا الله ونعم الوكيل ..تحركنا ومن مقابر لمقابر إلي أن عثرنا علي المشيعين وهم علي وشك الانتهاء من مراسم الدفن ..استلمت المبلغ من أكبرهم سناً فما كان من أصغرهم إلا وقد انخرط في البكاء بصوت عال كما كان يحدث في الماضي ..أيام الرقة والحنان والحب الحقيقي للجد والجدة ..الآن لو قيل لأحد الشباب جدك توفي لرحمة مولاه يقول لك ..والله ؟!! الله يرحمه ..لا بكاء ولا مجرد دمعة حزن واحدة .. ولغاية هنا المشوار انتهي .. قبضت المائة ألف ..وقلت اللهم لقد أنعمت فزد ..اتجهت ناحية السوق وكانت الحركة مزدحمة نوعاً ما ..سائق عربة ملاكي أصابني بالتوتر ..أزعجني باستعمال آلة التنبيه وبتشغيل الأنوار الأمامية وكأنه علي عجلة من أمره ..أفسحت له المجال ليمر ..وعند نهاية الشارع وجدت نفس الشخص وقد اشتبك مع سائق آخر في مشادة عنيفة وملاسنات وتدافع بالأيدي ..أوقفت عربتي لأستوضح الأمر ..الشخص الآخر وقور ومهذب بعكس الشاب المتعجل ..قال لي هذا الأخ صدم عربتي من الخلف ويصر علي أنني أنا المخطئ ..قلت للشاب المتعجل .. كل من يصدم عربه من الخلف هو المخطئ ..المفروض أن يكون نظرك علي الفوانيس الخلفية وتنتبه بمجرد أن تضئ .. لا أن تنظر يمنة ويساراً.. هذه جميلة وتلك قبيحة ..الشاب لم يتحمل كلامي ..شتمني بأقذع الألفاظ وتوجه نحو عربته وأخرج منها قضيباً من الحديد ضربني به علي رأسي فانبثقت الدماء بغزاره ..سقطت مغشياً عليّ ولم استيقظ إلا وأنا في غرفة بمستوصف خاص وكان يجلس إلي جانبي الشاب المهذب ..قال لي أنا آسف جداً يا خال ..الحمد لله الجرح سطحي وحالتك مستقره ..أنت شخص شهم ونبيل ..وأنا مصاب بمرض السكري ..تصور لوكان الجرح هذا براسي لربما أكون في حالة حرجة للغاية ..المهم سلمني أوراق توضح بأنه تكفل بسداد متطلبات المستوصف الخاص ورسوم إجراء العملية ..وبعد لحظات دخل عليّ رجل وامرأة عرفت منهما بأنهما والدة ووالد الشاب المتهور .. اعتذرا لي بشدة وقلت لهما أنا متنازل عن أية إجراءات لدي الشرطة وما حدث كان لابد أن يحدث ..شكراني علي هذا الموقف ووضعا مظروفاً تحت وسادتي وهما يغادران الغرفة ..وجدت داخل المظروف ثلاثة ملايين جنيه تكفي أقساط الجامعة حتي نهاية العام ..يا ما أنت كريم يا رب ..ياما أنت كريم يا رب ...

الحمد لله .. لقد جاءت هذه الحادثة بخير عليه
سوف احضر لأعمل سائقا كي احظى بهذا المال
ههههههههههه

نعم والله يا اخي لقد عملت سائق تكسي لفترة محدودة جدا
ورأيت العجب من الركاب فهم ليسوا سواء لا في سلوكياتهم ولا فيس ردوةد افعالهم
صدقني انها مدرسة الحياة في هذه المهنة اللعينة
تحياتي

أخي محمد ..جمعه مباركة ونرحب بك في السودان ضيفاً عزيزاً وحفظك الله من هكذا مواقف ..تقبل مودتي وتقديري .

رائعة وشيّقة هذه اليوميات ، سأتابعك أديبنا الكريم وفقك الله
دمت بخير وعافية
تحياتي

ومعا ثانية أديبنا الرائع
في رواية جديدة قالبها يبدو مختلفا قليلا
لكن روعتها كروعة سابقاتها

معك في يوميات نستعجل هطولها

تحيتي