مساء الصحبة ، و اللمة ، مساء الفل
و بنت صغيرة بتسرح ، على القهوة
بورد و فل
و دومنة ، و طاولة مفرودة
ما بين اتنين بيتنافسوا ، على المشاريب
و واحد مننا ، شارد و بيفكر
في أغلى حبيب .
و انا سرحان ، في أحوالك
و ترحالك
و وحشاني يا ست الكل
مساء الفل !
يا عم سيد يا ابو شادي
إنزل بشاي و بحصى ميزة
سويلي قهوة على الهادي
و قول للي جاي خطوة عزيزة
و انت ياباللو هات الشيشة
و حط على الحجرين بيشة
أصل المعسل يا ابو خالو
بيحب شغل التحبيشة
خلي المزاج في القعدة يطل
مساء الفل
هنلعب عشرتين تخاطيف
و مش مستاهلة قرص الزهر
يا ريت اللعب يبقى نضيف
و انا هلعب لحد الضهر
يا شيمي بلاش حركاتك
و خف يا عمدة و حياتك
و انت يا عم المتفرج
نقطنا و النبي بسكاتك
دا إيه دا بس ؟ دا حاجة تشل
مساء الفل