تسقط الحرية !!!
تسقط الحرية
فلقوا دماغى و صدعوها ..
بكلام عن الحرية ..
وانا عقلى مش فاهم بيسأل : يا خلق إيه هيه ؟
الواد بيشتم أبوه .. و يقولوا دى حرية !!
و يقل أدبه على امه .. يا سيدى دى حرية !!
يلبس محزق ، و متهزأ ، و متنيل على عينه ..
يا بويا دى حرية .
و البنت ماشية مشخلعة ..
و البشرة وردى ملمعة ..
و الفتنة صارخة ملعلعة ..
يا عمى دى حرية .
و حمار يدوسك فى الطريق ..
يشتم و يعْـلى فى النهيق ..
و لا تلقى منصف أو صديق ..
يا خويا دى حرية .
و دا صوته تقولشى ضفدعة ..
رافع عقيرته بالغنا : بأغانى هابطة مروعة ..
و الشلة جنبه مجمعة..
عاملين دماغ متكلفة و مشعشعة ..
برضه نقول حرية .
إن كان دا يبقى قصدكم .. فأقول لكم ، من فضلكم :
قولوا معايا : تسقط الحـــــرية .
مصطفى درويش سلام