شغب عقلىسابح فى بحر الوجود متأملا عقلى ..
جاهل بيسأل و يتأمل و بيقوللى :
لو كنت وحدى بالقياس و الجدل و أسلوبى و كمان علمى ..
هل كنت حاوصل للحقيقة : بإن الرب موجود و أوجدنى ؟ ..
أو كنت أقول الجحيم سـُعـّرت ، و اتزينت جناتُ عــدن ِ ؟
* عارف ............
حتنـتفض ثورتك ضدى ، و بالإلحاد تِتـْهـِمْنى ...
حاشا ..
أنا برئ من تهمتك و اللى خلق والدى و خلقنى و خلق إبنى ..
لكنى بادور عن حدودى : نِسبى أنا ، و الحق دا مطلق ..
و النسبى محدود .. جاهل .. ساعات كتير أخرق ..
** حاسب .....( دا قلبى اللي بيتكلم ) ..
دا الحق سبحانه علمك ما لم تكن تعلم ..
من قدرته رزقك تفكر و تتأمل و تستنتـَج ..
أعطاك أساليب البحث السليم و قواعد المنهج ..
انظر إلى السما و الأرض و اتأمل الملكوت ..
حياة طويلة أو قصيرة تعيشها , ييجى بعدها الموت ..
هل كل ده كان عبث يا أيها المخبول ؟.
* طب شوف جدنا أبو الأنبياء كلهم سـدنا الخليل ..
مش هوه اللى قال : لئن لم يهدنى (للحق) الكريم ربى ..
حاضل الطريق ، وأضيع و يسبح فى الضلام دربى ؟.
** قصدك تقول إن الخليل فى الجدل ما استخدمشى عقله ..
* حاشا و كلا .. مفيش حد استخدمه زى الخليل قبله ..
ليه بسى يا قلبى تسيء ظنك فيا و ِتتـْـهِمنى ..
هوه الصواب دايما معاك.. و الخطأ يا قلبى جاى منى ؟.
بالعقل نقدر نقول ربنا واحد و موجود ..
هوه العظيم المجيد ، هوه الكرم و الجود ..
بالعقل يا صاحبى نثبت وجود الذات ..
أما الصفات ..
فدى مِنـّة منه و مكرمة.. وكتير من الفيوضات ..
أما المعارف و الحقايق بعدها ، سيدنا الأمين جابها ..
بالذكر م المولى و سنة نمشى فى ركابها ..
دا القلب مؤمن - بفضل الله و هدايته ..
و احنا مع المصطفى مؤمنين نمشى ورا رايته .
مصطفى سلام