|
هبَّـت هبوب الوَلـَه..واشْتَبْ جمر القصيد |
واعشوشبَت روضة الحزن بلظى صدَّها |
أنزف غلاها.. وازيد هموم وجدي رصيـد |
واشرب ظماها..وينْبت بالحشـا وِدَّها! |
في كل لحظه وانا اخلق حبَّها من جديـد |
واذوق طعم المِنــيَّه من جـفا رَدَّها |
ماعاد لي طاقه.. أتحمَّل لو إني حــديد |
الروح ضاقت ..ونفسي واصـله حدَّها |
لولا غرامٍ جرى معْ كل نبضــة وريد |
ولولا بحورٍ بصدري فـايضٍ مَــدَّها |
ولولا ليــالي شَعَرْها والظلام الشديد |
ولولا غصونٍ تكسَّـر لاانـثنى قـدَّها |
ولولا وصايف حسين الدَّلْ ردفٍ وجيد |
ولولا ورود اجتنيها من جـنى خـدَّها |
ولولاي أتممْ عهودي من زمانٍ عهيـد |
ولولا خفايا غرامٍ مااقـدر آعــدَّها |
ولولاه شيطان حبي فاتكٍ بي مَريـد |
لااترك بَعَدْها قصـور العـشق وآهدَّها |
مأسور في حبّها كني مقـيَّد بقيــد |
عايش بلاقلب..قلبي طــايحٍ عنـدها |
قولوا لها وش تبي؟ماادري وش اللي تريد |
هي بسْ تَـشِّـرْ..ولا والله ماارِدّهـا |
ذنب الليالي.. خذتني وابعدتني بعيد |
ولاّ فانا مثــلما "بالضبط" هي وِدَّها! |
بنتٍ سبتني بها حسنٍ غريب وفريد |
الفـجر منها.! ونور الشمس من جندَّها! |
رعبوبةٍ زينها في كل لحظه يزيد |
يالعنبو دارها....يانـاس من قـدّها |