يا موجه م القمرة .. متعطره بالشوق
طل العبير منك
من بابك المفتوح ع الجنه ف عنيها
من بين شفايفها .. فاض الكلام أحلام
ف المسك يتهادى
كيوبيد بيتوضى ..
من شهد سال وارتاح على سنها اللولى
بنوته تاه الليل فى شروق عيونها الحور
مطرح ما بتخطى الأرض تطرح خير
ويا عالمين بالطير ... والروحه والمرسى
بحر الهوى أسفار ... ما باينه له مرسى
ولقا حبيبى رحيل ... والتوهه فيه غيّه
شديت رحالى اليه ... لو ع الشطوط مرسى
ويا موجه ما بيدى الغربة والترحال
درويش فؤاده تاه ..
ومضفراه بالشوق ما ين ضفايرها
نادت عليه لبّى
ع الشوك طلع يجرى
شال قلبه من صدره ..
وعصر فتات روحه فى الارض دوبها
وقال لها خطّى
نفسى أدوق النور من خطوتك دوسى
ما تبخلى وحياة من حكمك فيه .. وأتاكى هذا السحر
وإرمى ولو نظره ..
من عرشك المنصوب بين القمر والفجر
سمّى على قلبى خلينى اتبخر
حبة نسيم هايمة تملس على شعرك
خلينى ذرة شوق دايبه ف تنهيده
خلينى خيط تايه مغزول ف منديلك
خلينى لو كلمه.. وقوليها لو مرة
ويا عشق يا عاشقين ... ألقاش حداكو حل
للى الهوى زاره ... وف قلب قلبه حل
غرقان فى ليل شوقها ... وهو مش عوام
صعب السؤال واللا ... ما حد يبغى حل ؟
ويا موجه يا رايحه
أمانه يا موجه ..
تبلغيها سلام وقلوليلها سامحينى
والله ما بيدى إنى اكون عادى
مش ع القمر مولود .. ولا جاى من الحواديت
وانتى من الاحلام .. والسحر موالك
قلبك حيطانه قلوب .. وأنا قلبى طيف واهى
أحلامه ما تحلم .. تاخده لحدود أرضك
لكنه ما بيده الشوق رماه عندك
ويا موجه مهما يكون ... على بحرها روحى
خاطب أنا شوقها ... لو مهرها روحى
ويا مين يلوم غرقان ... والبحر فى الجنه
لو قدموله حياه ... وقال لها روحى ؟