كلاكيت
.. آخر مُوتَه..دوَّر
القصيده مسموعه
http://hyperupload.com/download/023e..._____.zip.html
قلب مغفل
...... ورده جريحه ...
..دمعه بتكوى
آهه بتكبر .. ومغلِّفها صدر ضعيف
كده يبقى الإكسسوار كامل
مشهد خارجى
على باب آخر فجر معدى
برواز فاضى على جدار قلبه
حلم برىء مكسور ع المكتب
شهقة أسيره ف آخر صدره
ياللا هانبدأ
كلاكيت آخر موتَه ...... دوَّر
" لأ أرجوكى
إوعى تدوسى عليه من تانى
قلبى خلاص مش قادر يحمل..
.. جرح جديد
أصله بجد ما عدش مكان ..
ما هو كله جروح
انتى وغيرك
حتى الشارع بقى موهوب ف زيادة وجعه
.. بميت تعليق عن عبطه الأزلى
طيب يمكن ....درويش يمكن
ميِّت لأ
لسه النبض المرهق فيه بيحاول يعشق
..... لبنات من جواه إتولدوا
علشان من بَرَّاه بيموت على إيد غيرهم
علشان قطر عنيكى العتمه داس على بكره ..
.. وورد شفايفك رشَّق شوكه ف قلبه الواهى ..
.. وفاته ف توهة حلمك ينزف
مشهد داخلى
بين التوهه وبين الظلمة
دمعه بتحبى ف آخر عينه
جرح طويل مفتوح على قلبه
عيط ... اشهق
غرق لى البلاتوه بدموعك
لقطه كبيره
كلاكيت ... موته هايبدأ .. دوَّر
" لازم تبكى
بس الدمعه أسيره ف عينك
بين حلمك وغياهب خوفك
أو بالأحرى دموعك خلصت
نزفت منك دمعه ف دمعه ..
.. ف حته ف حته من تكوينك
تسحب ساعه من أيامك
تسحب شط الموت لسفينتك
تسرق منك آخر شمعه ..
.. تفوتك جوا الظلمة بتحبى...
.. على شوك قايد نار من خوفك ..
.. إنك بكره تعيد م الأول
CUT .....م الأول
لأ مش ممكن
عيد من تانى
لأ مش قادر
موت من تانى
اكتم نفسك ..
اصرخ تانى وبرضه ف سرك
قطع كل ملامح روحك
علشان تبقى نجم بجد
علشان تبقى ف يوم بنى أدم..
.. كده تشبههم
مشهد داخلى
ZOOM IN .......قلبه
وضح صورة الروح الطالعه
عايز أشوف أمانيه بترفرف ..
.. أو بتفرفر
كلاكيت ... لحظة موته ..... دور
صوت من بره الكادر يعلق
آه وآهين
آه ع القلب اللى بيتقطع علشان بنت من القمرايه ..
.. جايه علشان ترسم له طريق .. واحد للجنه
ومن تغفيله عليه راح زاحف
علشان يلقى ف آخره عينيها .. بتحرق روحه
تخلط آخر نقطة فى دمه بآخر ضى بيلمس قلبه ..
.. وتعمل منه الرُّوج المغرى
جايز تلقى عبيط يشبه له
مجذوب تانى لسحر عنيها اللى هاينده له
صوت بهتان يدخل ع المشهد
يا النداهه حدش قالك
.. إن أنا آخر حد مغفل .؟
.. وإنى بدمى نقشت حكايتك..
على وش الفجر اللى هايطلع
تعليق تانى
وان ما طلعشى ؟؟؟
مشهد خارجى
بين أوجاعه وبين الجنه
على سلم حلمه الأشلاء
هات الرقصة
كلاكيت .. رقصة موته ... دور
"هى الرقصه خايف منها .. فوق السلم
فوق ما شافوش
دلقوا علىَّ دموع العالم
تحت ما سمعوا
سابوا الباب مقفول على بكره
لف بسرعه
..... ارقص أكتر
خلى الرعشه تهز كيانك
يمكن تنفض عنك موت ملزوق على عينك
شايفه وبس مغمى براءتك
مش عارف للنور هايشدك
ولا عارف تبعده عن قلبك
لف بسرعه أخرج منك .. هد ملامحك
موت على فرشة خوفك وحدك
يمكن بعد سنين لو ترجع
.. تقدر حتى تنام لك لحظه ...
... وتحلم فيها أنك تقدر تحلم تانى
بس......... stoooop...
كده مش نافع إنى أكمل
البطل المفروض ما يموتش
مش قادر أتحمل جرحه
حتى الكاميرا الجامده اتكسرت
البطل المفروض ما يموتش
قدامها اتقطع أشلاء ...
..بس الروح مش راضيه تفارقه ... عذابه بيكبر
لا هو راضى ف الظلمه يموت
ولا قادر ف الضى يعيش
البطل المفروض .. ما يموتش
الغى الفيلم
فركش ياللا
طفى النور
### إسلام محروس ###