فنان وعايش بالهوس
نفسه يسمَّع للنجوم
لحنه اللى لسة متعزفش
وبايده يطلع للسحاب ويكلمه
عن قلب لسة منهزمش
عايش ف بحر من الهموم
ولا يوم غرق
حواليه تلاقى غربيته
لجل اما تحميه الغرق
فبينطلق وبدون قلق
يغلب أعاصير الألم والإنكسار
ويروح مع صوت النهار
يسرح ... يغيب
ويتوه بعيد
وبيفتكر
أول ما كان
أول زمان
أول ما دق القلب كان
علشانها بس لوحدها
ف الحلم يصحى من جديد
نفسه يعيد
حلم السنين
دقة حنين
من بين عيونها كلمتين
سامع بكاها وحسَّها ؟!!
أول ما كان الرد لأ ..
ورجعت شايل حسرتك
والقلب خاف منك عليك
لبحور هواها تكَّسرك
ترجع تعافر من جديد
عايش تعيس !!
عايش سعيد !!
ميَّت بإيد من غير قلم !!!
ما الفن عاشق للجنون
فنان ف علم من ورق
بين الحروف
بين السطور
هيلاقى حلمه اللى اختفى
بفعل الهوس
*******************