إنتى هيه وللا غيرها
وللا هيه تبأه إنتى
إنتى مين يا صبيه
إنتى صوره وللا ميه
إنتى شكلك هيه إسمك
إنتى عينها هيه جسمك
هيه روحك وللا توأم
وللا فنك إنتى أنغم
شفت ليكى صوره ليها
نفس دمك ماشى فيها
حتى لون عنيها باين
والشفايف والجباين
هيه واحده والكلام
برضه واحد والسهام
هيه نفس سهام عنيكى
* * *
فاكره لما فرحت بيكى
كان ندايا بس ليكى
ليكى انتى مش لغيرك
كنت عايش عند موتى
كنت ميت جوه صوتى
والوجع طابق فى قلبى
شفت فيكى بدون ما اشوفك
إنك انتى بس روحى
صوره تانيه نسخه منى
قلبى قالى قبل منى
إنك انتى خارجه منى
رحت واخدك جوه عندى
جوه جسمى جوه دمى
عشت بيكى هناك فى قبرى
فى ارتحالى كنتى صبرى
كنتى نسمه ف ليل همومى
كنتى ضى النور ليومى
كنتى عينى كنتى ننى
كنتى أمى كنتى خلى
إنتى بس كنتى وطنى
* * *
هيه ديه تبأه انتى
وللا انتى تبئى غيرها
هوه انتى لسه انتى
زى ما انتى هيه هيه
وللا غيرها داب فـ هيه
وهيه تاهت فيكى انتى