/
/
..... ومابين دفاترِ العز منسية
شنطة هموم ف الأوضة مرمية
ومسحتها ونكشت أكوام الزمن
وفتحتها وكشفت بركان المحن
///
أول قصاصة في مهب الريح
من بين صوابعي تطير ببكاي والتلميح
قالت لي عيِّد يا همام بسلام
سيب الضحايا مابين قتيل ودبيح
كل من خروفك بسم ربك قوم
لكن حذاري الخروف يكون أخوك يافصيح
////
قصقوصة تانية مركونة ف الزنقة
قالتلي خايفة خروجي للخنقة
والله هنا دفيانة يا صاحبي أه ورايقة
نايمة بحرية مش برة مدايقة
دانتو ف سجن كبير واسع بلا قضبان
اسود غابتكو و صرخة السياف
ناس فوق رقابكو
سعرانة أهي وزاعقة
من غير ما تنتخبوا نصَّبوا روحهم
أدمنتو منهم سم بيجري ف الشرايين
سودة وبيضة الدنيا مش فارقة
////
و قصاصة تالته تمشي تتمخطر
مديت اديا بسلاسة للمنظر
لقيتها فاضية منضفة روحها
وسألت قالت و سطورها تتغندر
مش برضو أحسن من نفاق وخداع
مكتوب عليا بمُر متقطَّر
أو غش يخرب كل قلب وبيت
حتى السليم يا حرام برضو بيتأسر
ودا جيل هيخرب منه ويعشش
ف عقوله كدب ويمشي متخدر
لا تجينا نخوة لأمتي وتصحى
يتقندل الحال اكتر والبحر يتعكر
/////
والفالحة رابعة جامعة حبايبها
وفتحت جريت ورافعة حواجبها
قلتها ريحتك جميلة بهية رايحة فين
قالت لـِ افتحني يالله قبل امَّا اتخربها
لقيتها مدح وردح ف راسنا اللي فاسدانة
وبتدعي للسلطان وكل قرايبها
ولعت فيها بنار قلبي وشعللها
ودعيت بقلب الغلب والغل لكاتبها
/////
والخامسة قصقوصة طايرة ورايحة مني بعيد
وايديا مطلتهاش لا بضحك ولا تنهيد
قلتلها قولي حكايتك ولو فضلتي بعيد
قالتلي انا للحبيب دواه ورايحالو
من قلب تاني حبيب تعبان أردو سعيد
انا سر يا شاعر يصعب عليك حله
هافضل بسري يوصلني حداه ف الايد
////
قفّلت الشنطة ياعين والسلام لله
مخلوط دموعي ف الجراب والجراح وياه
بلِّيت قصاقيصي وشربت منقوعهم
عملت منهم حجاب علقته ف رقابتي
يمكن أعوز النصيحة مرة تانية القاه
/
/
/
وعجبي
كل عام وانتم بكل خير ورحمة وبركة
بمناسبة عيد الآضحى المبارك
نصر الله الإسلام والمسلمين آمين