صورتى مع البطل ( أحمد الهوَّان ) أو جمعة الشوان فى مسلسل دموع فى عيون وقحة
فى ندوة لتكريمه
على هذا الرابط
الله عليك
***
إلى بطل المخابرات المصري جمعة الشوان
***
كانوا عايزين منك أيه؟!
كانوا عايزين يخدعوك 00
بالصبايا والفلوس
والاَّ عايزينك تبيعنا 00
ولاَّ حتى يلبِّسولك
توب خيانة
والأمانه ف يوم تبيعها
والوطن ما تسمَّعوش
غير أنين
وجراح زياده
***
كانوا فاكرينك هاترضى
تطعن الضَّهر
اللى ياما
أكلت خيره
كلُّهم ما قدَّروك
بصُّوا فى العين اليمين
بصُّوا فى العين الشِّمال
عميوا ما شافوا الكنانة
جوَّا منهم
م الصعيد حتى القنال
لو شافوها
كانوا عرفوا
اللي زيك مُش هايخدع
طفل ماشى
يسأل الناس عن أبوه
اللى ما ردِّش بنكسة
والعيون راح يدبحوه
واللى لسَّه ف خندقه
مستنظر الفجر المبين
مِش هاتخدع
قطرة الميَّه وذرة الأكسجين
والأَّ أوضة
بين إيديها كان ميلادك
مِش هاتخدع
دقة الجرس اللى عاشت
جنب مدنة
والآدان بيقول صلاتي
تسمَّعه ُ
قولة آمين
***
مِش هاتخدع
مدرسة بحر البقرْ
و الولاد السمر ويَّا العمر
فضُّوا الاشتباك
بالقنابل
درسهم كان له ختام
مش هاتخدع سد عالى
وانت أبوزيد الهلالى
فى قلوبنا لك مقام
ولاَّ ضحكه
خطَّها فلاح لساقية
وهى دايره فى الصعيد
مش هاتخدع
بسمة القطن اللى بانت
فى البِحِيره
للجميل فى بور سعيد
مِش هاتخدع ...
مِش هاتخدع ....
بس والله خدعتهم ؛ الله عليك
آه يا جُمعه يا ابن شوَّان الأصيل
يللى واقف كالنخيل
ضحكتك
بالنصر جايه م القنال
لما شافت الأسود بالنصر
بيعدوا إلى شط المحال
الله عليك
الله على الوطن اللى رجَّع
ضحكته
بيميل عليك
يحضنك ويبوس عينيك
مصر مش ممكن هتاكل
يوم ولادها
مصر جات تانى ف معادها
مصر جايَّه تقدَّرك
مصر بتسمِّى عليك
مصر بتقول لك بشوقها
الله عليك
مصر بتقول لك بشوقها
الله عليك
الله عليك
***
6/10/2002