محتار ليه ..؟ ...
طب محنا يا صاحبي
خربنا الكون بعقولنا الورمة
عارفين إننا أصل الكارثة
ورافضين كلمة حق وحكمة
عارفين إننا جنس منيّل
ديتُه سقف وميّه ولقمه
إحنا خَربنا حياتنا بإيدنا
أصل عبطنا عمل لِنا أزمة
خلق الحالة اللي عايشينها
وخللا الشمس فعزّها عتمه
عاملين فاهمين معنى اللعبة
ونازلين طرح وضرب وقسمة
بس صراحة...كبيرنا فهمنا
وعرف ازاي يربطنا ف حزمة
عرف ازاي يعملنا مطايا
واقفة فدورها ومالهاش لزمة
واقفين نستنى رغيف عيشنا
ونشكر ريسنا على النعمة
د احنا الشعب العربي الصامد
كلمة تجيبنا ونمشي بكلمة