بتلوم بياني قوي
وانا في البيان أستاذ
وانت اللي منتش سوي
محتاج لمية عكاز
يبدو انّه صابك عمى
وهتعمل ايه انّما
أنا نجمي فوق ف السما
وانت اللي كسر قزاز
.....
إكمنّي واضح قوي
قلبك مولّع نار
وبتنقد اللي اتكتب
وترد باستهتار
من يوم م عقلك بغى
حبك ف قلبي اتلغى
ضيّعت معنى اللغه
والنقد و الأشعار
......
راحت عليك وانتهى
زمن العتاب وخلاص
ولا مني نظرة رضا
ولا عشره ولا إخلاص
ماشي ووراك الديل
يابو قلب زي الليل
خليك عويل و ذليل
تحت القدم تنداس
......
أنا شعري زي النور
الشطره فيه أميال
يروي الأراضي البور
تطرح نغم رحّال
وف كل حرف نخيل
يطرح غُنا ومواويل
وجريد يقول تراتيل
زي الكتاب ما قال
......
إبعد بعيد والنبي
وبلاش تكون خنّاس
دانا ابن موسى القوي
وكلامي تاج ع الراس
وسط الديابه الأسد
بيت للغلابه وبلد
جنب اللي زيّك وتد
ما تهزهوش أجراس
أحمد سعيد موسى