كتبتها بالعامية المصرية في صيف 2004
أتمنى أن تحوز إعجابكم
أصحا الفجر
أصلي جماعة
أقرا الورد
أعمل تمرين ضغط واخللي
كل عروقي تجري بدمي
بعدين اذاكر
أخرج بدْري
بعد ما ابوس إيد أمي وابويا
آخد كل حجاتي معايا
إللي بذاكر فيها تمللي
أركب باسم الله أتوبيس
وِقْفتْ جنبي
في الأتوبيس
بيني وبينها مكان دبُّوس
هي جميلة ؟!!
أيوه جميلة
ممكن نبقى اصحاب على طول
انطق يابني يالَّه وقول
طب أقول إيه؟
هي هاترضى؟!!
أيوه هاترضى
أُمَّال عاملة في نفسها ليه؟!!
حاول ....حرك نفسك ... يلا
آه لو كان الأتوبيس فاضي؟!!
يبقى الموضوع سهل وعادي
جاتني الفكرة
أعمل إنّ الأيوبيس مَيِّلْ
أحدف نفسي عليها واميِّلْ
لأ دي حكاية قديمة يا عيِّلْ
قلت أحط إديَّا في جيبي
يمكن إيدي تيجي في إديها
تضحك ليَّا ... أضحك ليها
بعدين نبقى اصحاب على طول
يلا اتشجع
لحسن تنزل بعد محطة
أو هاتحط في جنبك شنطة
يبقى طلعت صراحة أونطة
يلا اتشجع ... يلا اتلحلح
............
لأ دا حرام
لأ دا هاتبقى علاقة بريئة
تبقى الناس شيفانا كمان
نقعد نتكلم في محاضرة
نشرب ساقع نلعب طايرة
حطيت إيدي في جيبي بسرعة
يمكن إيدي تيجي في إيديها
حطيت إيدي في جيبي بسرعة
حسيت إن إيديا في ولعة
لما عرفت ان انا غلطان
إزاي أنسى ؟!!
إزاي أقسا؟!!
بعد ما حطيت إيدي في جيبي
حسيت إن في جيبي كتاب
جيبي ده كان فيه كتاب قرآن
جيبي ده كان فيه كتاب قرآن
................................
بيني وبينها كتاب قرآن
إزاي نساني الشيطان؟!!!
جيبي ده كان فيه مصحف ليَّه
أقرأ فيه ورد اليومية
.........................
رب اغفر لي
رب ارحمني
إني نسيت ـ وفي لحظة ـ عدوي
بيرتبلي
ويخططلي
ويخليلي الغولة حورية
ويخليلي جهنم مَيَّة
حسِّيت إن ما بينا اسوار
حسيت إن انا جُوَّا النار
لما فتحت المصحف أقرا:
لَا تَأْخُذْكُمْ بِهِمَا رَأْفَةٌ»»
لَا تَأْخُذْكُمْ بِهِمَا رَأْفَةٌ»»
لَا تَأْخُذْكُمْ بِهِمَا رَأْفَةٌ»»
رب اغفر لي
رب ارحمني
رب ما تجعل ليّا الدنيا
واجعل ليَّا الآخرة تمللي
واديني كتابي بيميني
والجنة دوما تناديني
وابقى من حزب الرحمن
أصحى الفجر
أصلي جماعة
أقرا الورد
أعمل تمرين ضغط واخللي
كل عروقي تجري بدمي
بعدين اذاكر
أخرج بدري
بعد مابوس إيد أمي وابويا
آخد كل حاجاتي معايا
إللي بذاكر فيها تمللي
أركب باسم الله أوتوبيس
وقفِتْ جنبي
في الأوتوبيس
بيني وبينها كتاب قرآن
هو حميني من الشيطان
لما فتحت المصحف أقرا:
" لَا تَأْخُذْكُمْ بِهِمَا رَأْفَةٌ»
" لَا تَأْخُذْكُمْ بِهِمَا رَأْفَةٌ»
" لَا تَأْخُذْكُمْ بِهِمَا رَأْفَةٌ»