أرواد ياهوى قلبي
فتَّشتِ بكتاب العمر عن شي قصيدي
لسَّه مااكتبتا
وعن نادرة حصلتْ معي بومضةْ زمنْ
وكتيرِ حبَّيتا
وقَّفتِ عا شطِّ الفكرْ والموجِ عمْ يرمي
لعندي كنوزْ
لولو ومرجانِ ومرايامن صَدَفْ
بالروح خبَّيْتا
اخطفتِ الصِرَرْ بالفرحْ واهربتِ فيها
بعيدِ عن عينيه
حتى مايحسد فرحِتي بكنوزِ ها
لمَّا أنا لقيتا
هونيكْ جواتِ الزمنْ هالغابِ بالنسيانْ
كانتْ لنا حكاياتِ بعيونا القمر سهرانْ
والوردِ عمْ يشلحْ عطرْ،
برشقات موجاتِ البحر
ونْوارسِ الحبِ الوفيّه مالية الشطآنْ
آه ياأنين الروح ماأحلى زماني كانْ
قلبي بنارو بيكتوي لمَّا عابالو اتْعنّ
ذكرى حياتي فــ بيتنا
وقلبي لَها بِيحنْ
بترجعْ بنسمات العبيرِ ملفلفي
بشوفا وبجي راحْ جِنْ
بركضْ لصوبا.. بتختفي
كأنا بدها من عذابي تشتفي
برجعْ لحالي بدمعتي
والشوقِ دابحْ مهجتي
ومابيستحي من لهفتي..
وعنْ عادِتو ما يكنِّ
شعر
زاهية بنت البحر