مين يصدق إني حيّ؟
لما غبتي وغاب نداكي الصبح كله.
مين يصدق إني وردة ما فتّحتش.
وشوك معشش في الغصون
والجنينة اتبدلت رمل وعطش.
وفضلت وحدي ف السكون.
ألف ….
أدوُر
أدور
وتاهت خطوتي
ف شـِباك خيوط العنكبوت
غريب وبابك مش لاقيه
مجنون وتاهت من عنيا سكتك
ونسيت عناوين البيوت
وفضلت
ألف ….
ألف
أدووووووووور
عطشان ومشتاق لك كتير
مشتاق لغيمة تزور ورودي من عينيكي …
مشتاق لهمسة من شفايفك
تحيي فيا العمر كله
ويختفي صوت السكوت
مين يصدق …؟
لما رحتي ....
قلت أدوب وسط البشر
ويتوه غنايا ف الزحام
وتدوب ملامحي ف الوشوش
مع إنهم ضحكوا لي زي صديق بشوش،
من غير ملامحك يا حبيبتي ،
بحس كل الناس وحوش
وأنا الغريب
فضلت
ألف
ألف
أدور
وقلت يمكن
في الليالي أشوف عيونك نجمتين
والقلب يبكي النبض فيه
ف الليل بحايل قلبي زي الأم
لما تروح تحايل طفلها.
ونهاري بفضل أهدهده
وأقوله اصبر واحتسب
الشمس مش حتغيب كتير
مين يصدق؟
لما غبتي ...
لقيتني صرخة في الفراغ
البرد ياكل جتتي
والحزن هو رفيق ليالي وحدتي.
وأنا اللي حيران في الزمن
بين ليل يفوت ... ونهار يفوت
ياريتني عارف أعيش لوحدي
يارتني عارف حتى أموت
ومين يصدق؟
إن حتى مرايتي
لما ببص فيها … بشوفك انتي ...
واشوف ملامحي بتختفي ..
وألاقي وشي بينزوي .....
ومش مصدق ...
مش مصدق
اني حبيتك أوي.