علي بابي
مافيش غير يافطة مكتوبة علي بابي
يامرحب باللي جاينلي واحبابي
لاقلت الوصف والمهنة
ولاحتي
شرحت الذل والمحنة
علي بابي
يقول الناس بسيط جدا
فقير جدا
لكن شاعر ماهوش جدا
علي بابي
صغار واقفين ف عرض رغيف
وانا طبعي كطبع الريف
اموت من بصة مكلومة
واهب اقفز من النومة
اذا ماسمعت آنة طفل بيتكتك
من الجوع اللي حاوطني
ماهوش م البرد
علي بابي
ندا أمي
ودعواتها
وحزن طويل مسكتها
علي اللي راح ف يوم النكسة ماسلم
باحس بآنتك يامة وباتألم
لكن عاجز
أمانة يامة تدعيلي
هاعلق دعوتك آية علي بابي
ومهما يقولو مايهمش
هاعيش مؤمن بأفكارك
تعيش مستور ومتهمش
ويمكن برضو يتهموك ف افكارك
يشيلو خانة الأديان
يقولو حتي أرهابي
فمايهمش
وانا واقف علي بابي
علي بابي