كل عام، وسنينك تحتفل بالشعل
لين تشعل بدينك شمع، تسعين عام
ما وقفنا، مشينا، مالقينا وصل
والمقفي يروح، ويقتفيه العسام
وش تبي بك جروحه! مالقت بك محل
السعه في دروبه، وش يبي بالزحام!؟
وانت قلبك قديم، وطار عنه النحل
والعيون الحزينه مات فيها الكلام
انكسر في عذوقك، نخلتين وفحل
وانتثر تمر عشقك، يوم طار الحمام
وانت من يقد يعيدك؟ يسمى بطل!
مت ياقلب، واقفر في سماك الغمام
لا تحمس، يسمى ماتحسه امل!
جمرة الشمس، تسطع قبل غزو الظلام
وان تلفت بعينه، وابتسم لك خجل!
ذبت، ماتدري انه ما يعرف الغرام؟
استر الحال ياقلبي، وخل الجهل
منت طايل عنبهم! والمحبين شام؟