خاتم سِليمان..
أسطورة عن الفرج الجيّ بمارد أو جان
أحلام تتجاب لك من أنياب الدنيا لحَدّك
بالمجان..
بس خسارة..
سقف القدرة
حابس عضلاته فـ شكليات
مالهوش على قلب الناس سلطان
وينوبك إيه؟
لو كنز القارات الستة كان ملك إيديك
ويتنه القلب اللي ف جوفك
ملو همومه
هينوبك إيه؟
لو عندك كل جناين شرق وغرب ما بين ممتلكاتك
والورد مخاصمك من يومه
راح تفهم أكتر
يوم ماهتعرف إيه معنى صديق
بيقدّم فيك السبت عشان
ما يلاقي على الحد فوايده مِتين في المية
وان دخل الحد حساب الماضي وعدّا وفات
ينهار السد تعدّي لك منه خيانة جميع المقاسات
***
***
أما اللي عايزه ** في الكون دليلك
وبسقفة واحدة ** شُبّيك ييجيك
مش في اختصاصه
يعرف في بكرة كان إيه ناويلك
و ان قُلت هسْكَر
ووعيت لروحك مالِك في بندر
وقصور وحاشية ** سلطان وعسكر
راح يبقى خوفك**ع السر يظهر
ساكن في جوفك
والنوم هيهرب**من ليل مكشّر
يتجمد الضي بين ضلوعك
من جوا قلبك
محبوس كأنه توفير في دفتر
رقم حسابه سر ف حياتك
وان مُت فجأة
راح تلقى جنة
لكن بهَنّة** القطر فاتك
المارد اللي مشاك بخطوة
جوا المتاهة
لا ساعتها يقدر
عنك يصارع
خازن جهنم
ويحل عنك
ربط السلاسل
ويفضي في الجنة برج بِسمك
وبدون مقدم
يبقى اللي عايزه في الكون دليلك
وبدون مؤاخذة
مفقود ومُعدم