كوتشينة حلم ولها أحكام
الحلم الصعب خلاص حبّيته
جوّه القلب يا ناس خبّيته
أصل يدوب ما أقدرشي أقوله
و لْـتفسيره شربته سقيته ..!
شفتوا ازاّي ..
أنا مش قايلْ
لأ .. رح اقول ..
شفت امبارح خير، و كلام معقول ..
شفت الشايب غايب م الكوتشينة
كانوا بيسألوا عنه في ورقة آسْ
وادْ و عروسة و حبة ناسْ
عملوا الحفلة و فضوا الكاس
رشوا التورتة و فتحوا اللعب
كان الكومي كما الترباس
و لا بيقش ، و لا بيهش
و لا بينش
و لا بيبصّر زي الناس
فجأة لقيت العشرة اتمسحت
كانوا بيقولوا عليها زمان
العشرة انْ طابت في الإحساس
يبقى صاحبْنا قمَر ونّاسْ
قبل اللعب لقيتْ حرّيفة
كل كلامهم بالتعْريفة
أنا مش عارف يطلعوا مين
بسّ انا فاكر بدأوا مْنينْ
لموا الورق المتنتور هنا و هناك
كان لونه محمر و حدوده بلاكْ
أكلوه دا محمّر ..
كلّه اتشمّر
إلا البنت عزيزة شبَاكْ
أنا ما اعرفشي ليه كده سمُّوها
بس رواية عليها حطوها
إنها كانت حلوة و غالية ..
كان في عنيها الكحل اتزوق ،
و"ريميه" وخْداه م الطبقة العالية
كات شغالة هناك بتروّق
مرة عجبها الحال في مرايا
قوم إيه .. لهفتها ،
و جوة الشنطة معاها حاجات حطيتها
لمّا الدكتورة جتْ سألتها
راحتْ ضاربة البوز ، وبصوتها كلتها
كات غلاطة ..
على طول بتبوّق
كل الناس عاجبينها عزيزة ..
أصل عنيها شباك صيادة
كده كالعادةْ
لماّ بترسم كلمة حب
يقع الشايب كده في مطب
تجري عروسة وْ واد مع كومي
تلقى كبابي كتير تنكب
جابوا الكاس ..
راح الناس في جنينة وْ وقفوا مع النسناس
عقدوا مصالحة و اتفاقية على الحراسْ
نطّ الأسد المتغوّل ، نده اللبؤة وْنمر معاها
ضحك الفيل و رمى الكُرّاسْ
جات كراسته مع الخرطوم
في الغابة التانية على الأطفال
كلّ الزّوّار اتخضّتْ
ردّ حصانِ القلعة وْ قال :-
"كله ينام .. و لا حدّ يقوم"
اقروا الفاتحة على المرحوم
صحْيوا الناس
جابوا الكوتشينة اياها
فرّوا ورقهم بصْرة كومي ، وْ قشّ بلاشْ
كلّه بلاش
و الشيك متفرغ متجهّز ..
م الدفع هناك على طول بالكاشْ
كاش إيه يا سعادة البيهْ
الكلّ عليه تمنِ الرشاش
الكلّ يا بيه هبّاش كشّاش
الكل فْ لعبُه بقى البكاشْ
كله بيسمع .. كله يقولْ
كلُّه يغني على الأرغولْ
أصل حياتنا فْ طبق الفولْ
خلّيك فول ..
زيّ ما قالوا اللّعِيبة فْ حلمي :-
املا التنك وْ علِّي الراسْ
اكتب .. اشطب ..
العب .. اضرب
احسب .. عيشها يابيه كنّاسْ
ارسم صورة ، وْ لحّم غِنْوةْ
أصل اللحم على الجزّار
و انت يدوب مليان أعزارْ
بتْمصْمص لماَّ تدقّ الزار
أحسن فكرة وْ مش بهزار..
اقرا كتابك .. عيش لشبابك بالمقلوب
خلِّي الفنجان على طول مقلوب
افتح كوتشينة على المطلوب
اطلب سهرة وْ مُهرةْ ، وْ قصر الطاهرة
زور الطاهْرة و القنديل
نوّر قناديل
افرد مناديل
غني المواويل
طب عيني ياليل
و ياعيني زمان
وكلام بيجُرّ كلام في كلام
جوّه الحلْم سمعت كلامْ
وِ لْقيتني بقول و ما ليشِ وْدَان :
أنا كنت زمان بترجى اللقمة من المعازيم
دلوقتِ بقيت مشهور مآزيم
معروف بقراية الكفّ مع التعازيم
الفنان و التَّعبان كلّه بَشُوفُه بلون تِِعْبان
و الله زمان
و زمان على إيهْ
كلمة حاضر بتْريح
قالوها زمان من غير برهان
انتَ عليك بس البرهان
قوله وْ غيب
ترهيب ترغيب
تعتيم تغييب
شجرة وْ بتسيبْ
أحلام للغيب
على شكل حبيب
و لْكلّ طبيب بتْحلّل عيب
متقولشي ده عيبْ
يطلع لك ديب
و يهزّ عَلاَمُه على التسريب
و ياعيني عليك ..
تُدخل زنزانة الحب غريب
بعدين تضطر تجيب ملاّحة وْ حافْ
تاكل و تبوس الإيد خوّاف
حتى الميّة فْ عين أفريقيا
لازمة نْوافق ليك يا أنيقيا
لازم حتى نهيقيا يْوافق
أحسن حلّ توافق
أيْوه تْوافق
إني أرشّح نفسي وْ كتّر خيري إني هـ اوافق
علشان خاطرك يمكن انافق
يمكن ألعب عشرة كومي و اتغلّب
أكسب بصْرة و اضيفها لْخصمي
أصله حبيبي وزير لمرافق
و المتْفرّج كَنُّه وزير إسكان
بسّ لخصمي حبيبي مرافق
شفتِ ازاي اللعب أصول
وانا إبن أصول
صاحبي هناك على درجة صول
هوّه صحيح كان ساب الخدمة زمان
بسّ وإيه يعني مهوش مفصول
كل حاجات الدايرة عارفها
بيخلّصها ،
و يرصّصْها ،
و يقرفصها ،
و ... تمام بأْصول
ثمّ اناعايز شقة وْ رووفْ
مشْ بكْفاية بقيت معروف
بالمعروف أنا هـ اخد شقّة
جنبها شطّ وْ قرية وْ رقّة
وانْ محصلشي تعالوا وْ دوقوا
شِعْر بجدّ عشان ما تفوقوا
هـ احكي القصة بْحالها وْ حالي
كلّ زمايلي عارْفين حالي
جوّه المسرحْ و على الشارع
و الإعلام على طول بيسارع
أو بيصارع .. كلّه ده بارع
جوّه المصنع أوْ في مزارع
واكل طعميّة وْ حتى كوارعْ
حتى الطالب .. كلّه يطالب
فكْر شباب مليان بمطالب
شوف الدّشّ وْ نتِّ وْ غالب
قصدي الموجب يصبح سالب
هوّه احنا بنلعب .. ولاّ بنلعب
أيوه صحيح ،
كُله بيلعب ع الكوتشينة
حِلْوَة وْ شينَةْ
جوّه الحلم لمَحْت الماسك شيشة مْكشّر
كان بيحطّ حجر منْ غير تخشينة ..!
قاللي بصوته العالي يا غالي:-
إوعى يغرك ورق الكوتشينةْ
دَخَلتْ فيها الطاولة وْرمتِ الزهْر
و الشطرنج دفع لي المَهْر
شفتِ السمّاك بيخاصم نهْر؟!
إوعى الجوع بيجيب القهْرْ
إوْعى حْوار متمدّن فاضي
هوّه حوار متأوِّل فاضي
ولاّ هتعمل ليّه حوار؟
و تهدّدْني بـقطّ وْ فارْ؟
ولاّ انا هـ اكل م الفوّار؟
انتَ شايفني راكبني حمار؟!
قلت يا صاحبي انا مالي وْ مالك
أنا بلعب كوتشينة و لا نيشْ سالكْ
قال متاكلْشي دماغي معاك
و مهيشْ ناقصاك
راحتْ واقفة عزيزة شبَاك
قالت بعدين .. مش ناقصة مشاكلْ
بعديها ضحكتْ لي قالتلي :-
"بِستِكْ يا عبيط .."
و بلهجة رقْص قامتْ تظييطْ
و يدوب ماشية قالتلي كمان :-
"بالأجنبي خلِّيك يا حبيبي الراسي
من فوق راسي .. خَلِّيك عاكل
ولاّ الشايب إمتى بياكل؟"
قُلْت تمام .. دِلْوقتِ أنا هـَ اكُلْ
أنا مِتوَكّل .. مشْ متْواكِلْ
ميهمُّوش في البيتزا هياكِلْ
أنا بتشكّل .. مش بتشاكِل
بعد شويه انا قُمْت صحيتْ
كُنْت انا باحلم بسّ ، وْعِيتْ
قُلت لنفسي انا شايف بكْره
مَيّتي رايقة ، مَهِيّاش عِكْره
آدي الحلم اتفَسّر بعد سنين
رجْعتْ روحي لنَفْسي يا عينْ
رِجعتْ بلدي ، وْ بَرْقص بلدي
و انتِ يا بِنتي .. قولي لولدي:-
شفت النسر ازّايْ متحصّن
أصل حصانه الناري محصّن
كان م الشعب العربي يا خُويْ
مصري وْ حرّ وْ تسأل بُويْ
قولوا يا ولادي سلام لبلادي ..،
و ألف تحية لأرضِ الوادي
......
وادي الحلم خلاص حبّيته
جوّه القلب يا ناس خبّيته
لمّا اتحقّقْ كنت بديتُه
أصل الحلم الصعب بدايته الفكرة
و انا من بكره .. مش رح انام
مش علشان ما احلمشي معاكوا
بس عشان لعب الكوتشينة
لعب سياسة وْ ليها أحكامْ .
.....
واليوم الاستجابة لابدّ أن تكون صريحة ، وليست لعب سياسة ، و لن تكون مطالبنا أضغاث حلمٍ بعد اليوم ،
و إنما ستكون على أرض الواقع ، و على لسان شباب مصر
دام التفاؤل الجماعي