البت حلوه وبيضه
والشعر ايه جميل واصفر
عنيها خضرا ولا زرقا..
وماشيه ع الوشوش تتغندر
من حلاوتها .. آآآه ياني
شافها الأسمراني
حليوه و معجباني
جري عليها وقال
دوبني حبك أأأه ياني
ممكن يا بيضه
انول الرضا
جمالك دبحني
زي القضا
تعالي سوا
نكيد العدا
وآآآه من حبك أأأه ياني
ميلت البنيه بغرور
من غير كسوف ضحكت
وصاحبنا جناح مكسور
اتجنن لما وقفت
جري عليها وقال
من حبك ااااه ياني
قالت له عندي شروط
اقبلها مترفضهاش
احسن اكسر راسك
وابيتك ف الأنعاش
صرخ المعلم .. شروطك اماني
عيوني ليكي يا بيضه
هقبل واهو كله ليكي
بس وحياتك خليكي
جنبي .. وأنا من قلبي اراضيكي
وآآآآآآآآآآه ياني
قالت له بيتك وغيطك ليا
وفلوسك تحت رجليا
تبيع اهلك تبيع ناسك
وكله عشان خاطر عنيا
وافقها الندل الأناني
وآآآآآه منه اااااه يا ني
قالت : تيجي رافع الرايه وخاضع
شايل عارك قدامي وراكع
أذلّك .. وأوعي تقول
أنا شايف ولا انا سامع
وافقها الندل الأناني
وآآآآآه منه اااااه يا ني
تبيع حياتك لجل ماقو ل
انك محترم وابن اصول
ولو حاولت مره تنطق
هقتلك زي عجايز الخيول
ضحك المغفل
وقال يا مجنناني
وآآآآآه ياني
عواد هيبيع ارضه يا جدعان
وهيجري ورا ضحكة نسوان
هيسيب حياته تضيع هدر
وهيرجع موطي وخيبان
باع القضيه بضحكه المعلم
ما هو لا درس ولا اتعلم
وولاده م الهم بيصرخوا
وهو ساكت ما اتكلم
راحت الأرض يا ولداه
عواد في الحياه تاه
انداس تحت الرجلين
نسي وشه من قفاه
حبيت اقول له
يا عواد ايه اللي صابك
ضيعت حقك وحق ولادك
حتي كونداليزا يا جدع
خليتها من اسيادك
قوم اصرخ وقول لأ
قوم اصرخ وهات الحق
انت وهما علي باطل
وولادك هما الأحق