كلمات ارتجاليه
21/11/2011
يا عم فاكر دمنا نهيبه
ولا فاكر دمنا فته
بتنهش من قلبنا كل يوم حته
والعتمه في قلبك سته على سته
بتضرب ع الجمجمه نبوت
بتاخد من بؤنا النعمه
ومهما تضرب بالنبوت
ومهما تضرب بالشلوت
موش هتاخد مننا سكوت
آدي هتلر طواه الموت
وبوش ضاع تحت المكانس
وشارون نفسو في الموت
شيطان على نفسو دايس
وصاحبنا المفتري له نهايه
ياريته بالظلم حاسس
سايب كلابه فـ البلد هايجين
مع مين يا استاذ بتتنافس؟
ولو بقينا حتى ف عدم
هانعيش هانعيش موش هنموت
يا عم احنا ولاد النيل
مهما عملت موش هانموت
هنكتب ع الحطان (حريه)
حريه عناوين الدروس
في نفس المكان نكتب
أحنا بشر .. م احناش تيوس
واللا انت فاكر
يا بونجمه على كتفك
إنك فتوة سايق جاموس
ولا يمكن مش شايفنا
ولا بتهشنا زي الناموس
إحنا يا بني اللي شلنا العلم
في سينا يا محترم
وإحنا اول من مسك القلم
والمسطره والفؤوس
إحنا الأماني وإحنا المعاني
إحنا القاموس
في زمن ظلمكم
إحنا الشموع
وإحنا الفانوس
مالك بشباب التحرير
ما يقعد ف أرضه
ولا إن شا الله يطير
ب مطاطك وغازك ودخانتك
بتقتل الجمله والتفسير
مش هنمشي .. مش هنمشي
دوس علينا برجلك دوس
موش هنمشي موش هنمشي
30 سنه لا شمع ولا فانوس
مش هنمشي .. مش هنمشي
بكره نعرف مين التيوس
إحنا في وشكم شوك
إحنا من تحتكم دبوس
إحنا نجوم السما في الليل
يجي النهار نطلع شموس
وحسبنا الله ونعم الوكيل