حسني مبارك رايح فين *** حتسيب الزاي المصريين
قبل ما تسمع كانوا فين *** وبعهد سيادتك!! صاروا فين
كنا بعهدك لا انتخابات *** ولا دوشة حكم وخلافات
وفي جيبك أربع تسعات *** وكل سنة وانتم سالمين
كنا نروح نعيش ليالينا *** ومحدش له دعوى فينا
عرفنا حق البلد علينا *** ما نقلكش رايح فين
وعرفنا الحانة من المانة*** وهدومنا كانت واسعانا
وعالسنة ربينا الحانا *** بس حلقنا مضطرين
وبعهدك صلينا وصومنا *** ومحدش كان بيرجمنا
ودعينا في الليل وقومنا *** بس مندعيش عالظالمين
وكنت مريحنا من العد *** وفلوسنا نجبها عالقد
وآخر الشهر نمد اليد *** مش أحسن ما نكون قاعدين
خليتنا لا روحنا ولا جينا *** وبكيت أم الدنيا علينا
ولو مش مصر غالية علينا *** كنا حلفنا مش راجعين
انت الحاكم انت الأولى *** حتى تسد ديون الدولة
مش يمكن يهديك المولى *** وتقولنا دول كانوا لمين
شعبك إزاي بيندان *** وعندو ميت مليون فدان
مش يمكن انت نسيان *** أو إللي إدولك نسيين
وبيصرح عمر سليمان *** وبيقولها وهو زعلان
وكأنو الريس غلبان *** واحنا ولاد الملاعين
مش شايف واللى انت معشي *** ظلمو بقى أقد إي متفشي
وانت الآخر سيبنا ومشي *** منتو كلكو نفس الطين
فين حتروحو عالمريخ *** في حتموتو بشرم الشيخ
روحو وموتو دالتاريخ *** حيسجل انكو خاينين
خنتم للأمة وبلادكم *** ورستم عار لأولدكم
والأقصى مهو كان قصادكم *** نادى نادى ولا سامعين
وبنيت لغزة أسوار *** وقلتلها موتي في النار
لاانت رعيت لحق الجار *** ولا أطعمت المحتاجين
وميتنا جريت في النيل *** وغازنا جري لإسرائيل
وبعهدك صار البرميل *** من جاز المدفا بجناحين
شايف الكلمة مش طايبالك *** والشعب المصري على بالك
مستعجل طب اترك مالك *** والحق زين العابدين
مش بس تسيبلنا المال *** متخدش لحاجة بتنشال
خد عيلتك وعلاء وجمال *** وعلى داهية بعد الستين
حيزول الظالم ويحوْل *** مهما يعمر مهما يطول
يا بيهرب يا يروح مشيول *** يا بيتحاكم في الزنازين
يا رب تفرج همتنا *** وتجمع دينا وأمتنا
انت اللي بعدلك سمتنا *** أمة طه المسلمين
من أشعاري