تعالي وحطي من همك
على همي
وشقي جيوبك الفاضية
على دمي
نشف دمّي ف حواريكي
وفاضت دمعتي بيـّـه !
أنا اللي خرجت بفديكي
وروحي شايلها ف اديـه
وصدقني اللي كان جمبي
وصدقته
ولا عرفني ولا عرفته
شبك ايدي ومشي بيا
بئينا اتنين
بئينا متين
بئينا ف ثورة بالملايين
نزلنا نقولها .. حرية
****
نزلنا عشان كرامتنا
وناس تعبت وربتنا
نزلنا لنقطة المية
نزلنا عشان أهالينا
وناس عايشة حوالينا
بنظرة حب منسية
***
قابلنا رصاص
وماتت ناس
وع الشاشه بئوا الأنجاس
يقولوا علينا كام مية !
كسرنا الظلم والظالم
وقبل ما كله يتحاكم
خلوا بينا الحرامية
****
وبعد ما رجعت الملايين
في لحظة
انضرب اسفين
بقت حسابات .. وتصفية
ورجعوا اللي قالوها حرام
يقولوا يجوز
وكله أوام
لحق (شلته) و (طبلية )..!
***
وقالوا انت البعيد كافر
أنا فعلا اكون كافر
عشان ما استكفي من ديني
بدقن ، وقصر جلبيه
واشيل الناس واقعدها
وامنها واكفرها
بنظرة بس بعنيا
وكله حرام
وألف امام
وناس مش عارفه أي كلام
واهو الأعمال بالنية
تدور وشك الحيران
وتبكي فرقة الإنسان
وده مسلم
وده مسيحي
وده سلفي
وده إخوان
ودي شلة عواطليه
وناس عايشه في تكييفها
عذاب الناس يكيفها و
مفيش حاجه على كيفها
وكل خلاف بأغنية
وطن بيضيع
وكل شريف
فاضلله يومين
ويبئى ف زمرة الجرابيع
ما هيلاقي
في بيته قرص طعميه
وطن بيضيع
وباقي يومين
ونبئى كلنا مقاطيع
لا طولنا قصاص
ولا دية !