رحلة عمر
بقلم
آمال محمود كحيل
علمتيني الطيبــة يا أمي
واني اتحمـــل ، واني أضحِّي
علمتيني أشوف الدنيــا
رغم أساها بلونها الوردي !
علمـتيني أداري همــــومي
واظهر دايمًا بسمة فرحي
وابدر خير مطـرح ما باعــــدِّي
واغزل حـلمي يادوب على قدي
علمتيني الصـبر يا غاليــــة
واني ما افرط يوم بمبادئي
حتى ان كنت ف جبهة لوحدي
ولقيت كل العالم ضــــدي
واتعلمــت الدرس كويس
بس يا أمي عانيت من جرحي
أصلي نسيت اني أنا إنسانـة
ومانيش زي ما فاكـرة ملاك
وان مشاعري نقطـة ضعفي
وان طـــريقي ملان أشــواك
واني ساعات بانهار واستسلم
واني مانيش حِمــل انكسارات
ليلي نهاري باعزي ف نفسي
واســـأل ليه فتيني لحيرتي ؟!
خايفة لاخونك يـوم من يأسي
أو في عينيـَّــه تلمحي بؤسـي
أنا مش هانكــــر إني حقيـقي
اتعـلمــت الــدرس يا أمي
بس ساعـات من شدة ضيقي
باحتاج حضن يدوّب همي
نفسي أصارحك نفسي أفضفض
باللي داريته ف قلبي كتير
حلمي ألاقي الراحة ، واغمض
أصلي تعبت من المشـاوير
حزني مهوش إحساس جوايـــا
عايش فـيَّـه مالوش تفسير
حزني حكايـة ماليهـــا نهايــــة
عشت فصولها وشفت كتير
شـفت يا أمي نفـوس متهانـــة
ونفوس بره حدود الصورة
شفت الناس في الكون شقيانة
وعيون فيها دموع مقهورة
وقلـــــوب بالأفـــراح عشمانة
وقلوب في الأحزان مغمورة
وإيدين في الأغلال تعبــــــانة
وقلوب بالألـوان مبهــــورة
وانا بين دول أو دول حيرانة
باتخبــــط في دوايـــر شكي
شـفت كمان الضحكة بتبكي
ودموع بتزغرط فرحانـة
شفت ميزان الكون متلخبط
والأيــام لاهية وسكـرانة
شفت وشوش من زيفها بتبرق
ووشوش م المكياج عريانة
شفت الصبـح بليـلي بيغـــــرق
ونجومه بتغــــرب وسـنانة
شفتني جوه تابــوت شايلينني
والناس ماشية ماهيش دريانة
واما سمعت الله يرحمهـــا
حسيت إن الحـــلم اتحقــق
واني خلاص ودعت الدنيا
واني بقيت أسعد إنســـانة