الودع

يلى رميتوا الودع
فكـوا القيود حبه
صاحبى فـ قلبى وَدع
كل الحاجات سابها
لو قالوا مات الجدع
يبقى على الجنة
لساكي يا جنة
سايبه فى قلبه حنين

يلى سكنتوا الحى
دمعي الرصاص الحى
قالها المؤذن حى
رددنا بالملايين
وادى الحياة ضحكة
يا بو ضحكة خاوية جنان
ساكن هناك فى جنان
مزروعه فل وضي
طاهر ومالك ذى
عمرك ما بعت الطين

علشانى زيد الخُطـا
ناحية بيبان النور
طافح فى بلدى الخطا
شهدوا شهادة الزور
وفى عز ابداعي
قلمى صبح مكسور
يا عطارين دلــــونى
النحس ده كله منين !!!
ده انا تراث حطين

يا بلدى ليكـى مسارح
فى الهم ولله مـا سارح
ما انا اللى عشت بحبك
وزرعت عمرى فى كفك
لكن خلاص وبأمرك
هصبح فى طيرك جارح

نيرون يا خلق ناويها
جايب عا ليها وطيها
ولع خضار الوحدة
وبدل ما تطفوا الفتنة
انتوا اللى بتحموهـا

وادى اللى كان انسـان
اصبح جماد مليكـان
والروح يا خلق كمـان
محبوسة فى الفتارين

كل الغريب فى الامر
ان انته مش مجنون
هما اللى قالوا السعر
وانته عليك ما تهون
وادى الحياة فرصة
فرصة تبقى رسول
بس انته ليه تبقى
عبد للمسئول
ملعونة يا بلدى
لو رافضة للمعقول
لو رافضة للمعقول

بقلم / احمـد الشهيبى

رحم الله شهدائنا وتقبلهم فى عليين
الفكرة جميله ومواكبة للاحداث وصرخة ألم تحرق صدور الجميع
النص شابه بعض الخروج عن الوزن والقافية
تحيتى شاعرنا
وبالتوفيق