حلم

شفتك ببابي
شهقت : مو معقول
ومضة فرح
لمعة ندي وهطول
كيف وصلت ؟
قلبي نده
بس الحكي مشلول
غط الحمام
وناح بالشرفة
وتراكدت لتشوفك الغرفة
والياسمينة ال عرّشت
ع الباب
رقصت فرح
تكيت على الدرفة
شو عرّفك بالبيت
وأيّا طريق مشيت
والدرب كلو نزول؟؟
من فرحتي وخوفي
خبّيت وجّي
براحة كفوفي
وفركت عينيّي
عالباب مركيّة
بسمة أمل
من تمّك المعسول
تقلي : اشتقت
يانور عينيّ
لا تهربي
باب الحلم مقفول

جولييت بدر