أنا مش هنا

الباب ده لو خبّط ساعات
نفسي أقول أنا مش هنا
مش من هنا
روحي غريبة متعكننة
حلم مسروق م الليالي السود .. شرود
من أول الطفل اللي عاش طول عمره هربان م الجحود
لشاب كان .. فوق الزمان .. حلمه طموح ممدود
ماشي يخبّط بالأمل على كل باب مردود
معرفش إمتى ضهره انحنى
واتسرسبت منه السنين
سارح ف غربة مالهاش حدود
عشرين سنة راحوا هناك
عشرين سنة ماتوا هنا
معرفش إمتى وفين نسيت نفسي أنا
وانا مش هنا
مش من هنا
روحي غريبة متعكننة
***
وبيغري بيّا الحُزن كل الكدابين
ودي موهبة
لما تكسر قلب مكسور من سنين
على سبيل التجربة
هو يعني هيعمل إيه
ده مفيش ف جيبه جنيه
وأهله مش حواليه
لو تعرفوا من أد إيه
متهانة وسط المجرمين
كل القلوب الطيبة !
***
يا صاحب الوعد اللي خان كل الوعود
حتى الأمان .. أجلته ليّا بعد الوجود
الجسم لو زاد الألم .. العقل يتخطى الحدود
قضيت حياتي يقين .. ودموع ف كل سجود
لحد ما فاض الوجع فبقيت أشك ف كل شيء موجود
***
أستغفر الله العظيم
ده اكيد وسواس
إديني يا رب الإشارة
إني عايش وسط ناس
إديني يا رب الإشارة
أنا قلبي في طُهره نبي
وتهمته الإحساس
خالقني ليه وسط الحجارة
ضاعت قلوب الطيبين
واتشمّتوا الأنجاس
ما عرفوا شيء عن الطهارة
ولا عندي طاقة إبراهيم
أمشي بفاس
واكسر قلوب الفجارى
ولا باقي مني رضا
يرموني بيه ف النار وأعيش
يا ميت خسارة !!
***
وبعد عمري دا كله ما عدى
جاتلي الإشارة
وكلموني خدمة العملاء !!
قاللي محمد بيه معاك أستاذ علاء
حضرتك .. قدمت للدنيا طلب .. م التسعينات
وبَعَت ف انصاص الليالي ألف دعوة مستعجلة
زي ما هو ثابت هنا
عشرين سنه
اتأخرنا عليك معلش
السيستم ف السما واقع
ما انت محامي وعارف بردوا
ان دا واقع
للأسف .. طلبك مرفوض
كل اللجان قالوا خلاص فات الأوان
والمذكور فاته الدور
من زمان
والمذكور عايش ف النور
يعني دا بردوا مالوش في الدور
الطلب من غير مزايا
لا فجر فاجر
ولا سنه يمشي ف الصياعة ويبقى قادر
شغال محامي وعنده ضمير
يعني شحات بالكتير
وكمان شاعر !!
راح تعمل ايه الدنيا يابني ببتاع المشاعر
طلبك أكيد مش عندنا
وانت يابني مش زينا
ده انت حتى ليك هنا
قضية طرد
وام واخوات قرروا ان مالوش في ورثنا
أصله مكنش عايش هنا
منعرفوش
وسنه عدى الأربعين يعني مالوش الا الزنا !
للأسف طلبك مرفوض
واتحفظ
وسط اللي عاشوا بقلوب حيارى
الدنيا يابني من زمان
كل شيء فيها تجارة
مكسب وخسارة
بس لسه للي زيك من مواليد التمانينات
فيه عرض ساري بالمجان
ف كل حته حتى النقابة
للي عاشوا زيك غلابه
لو توافق
أبعتلك القايمة تشوف السعر في شقق الدعارة
يا ميت خسارة
مفيش مسكن أو دوا يكفي قذارة مجتمع
لما يبقى المجتمع هو القذارة
يا ميت خسارة
***
وقبل ما تروح م السما شمس الأفول
بعتتلي بنت أصول
تقول
يا ريت زمان شوفتك هنا
إنت كنت عايش فين
قبل ما تيجي حينا
متزعليش
أنا قلبي أصلا مش هنا
ومش من هنا
والحكاية مش فرق سن
واللا حتى جروح زمان
اللي منها الزمان يئن
واللا ناس عاموا في دمعة
بكاها طفل يتيم بيزن
ومنضفوش من القذارة
الحكاية يادوب سؤال
كل يوم ف قلبي يرن
أنا شعري شاب ازاي
وأنا واقف هنا
روحي غريبة متعكننة
وسط ناس
ما يعلم بيها إلا ربنا

محمد سلامه
16/5/2025

ما أرق هذا البوح وما أعذبه
قلمك يتحرك مترجما نبضات قلبك وعقلك
كلمات حزينة تحمل معاني فياضة من عمق إنساني شفيف
وما أجمل أن تحمل الكلمات صدق المشاعر بلا تكلف ولا رتوش
ويبقى الصبر غذاء روح المؤمن
ليلقى خيرا بصبره من رب رحيم كريم
دمت مبدعا ودام لنا هذا الإبداع الجميل.

ما أرق هذا البوح وما أعذبه
قلمك يتحرك مترجما نبضات قلبك وعقلك
كلمات حزينة تحمل معاني فياضة من عمق إنساني شفيف
وما أجمل أن تحمل الكلمات صدق المشاعر بلا تكلف ولا رتوش
ويبقى الصبر غذاء روح المؤمن
ليلقى خيرا بصبره من رب رحيم كريم
دمت مبدعا ودام لنا هذا الإبداع الجميل.

شكرا لكلماتك العطرة أستاذة نادية
تحيتي الجمّة