آه يا زمن
ياللي زرعت فـ قلبنا حب الوطن
سكنته جوا قلبنا
من غير ضرايب للسكن
وفرحنا إنه فـ وسطنا
هيشيل همومنا كلنا
ويرجع الحلم اللي ضايع مننا
ويحبنا....
ويضمنا.....
بحنان ابونا وامنا
بس الحقيقة اتغيرت
وقلوب كتير اتحجرت
واللي بنعشق بسمته
خلا قلوبنا اتحيرت
بيحبنا....؟
ولا باينه يا زمن
واكل حلاوة بعقلنا
ياما نفسي أقله واسأله
يا وطن بتحب مين
ناس بتعزق فـ الأراضي
لجل قلبك يبقى راضي
ولا ناس باعوا الأراضي واليهودي عليها ماضي
لجل ياخدوا أرنبين
يا وطن بتحب مين
اللي سارقك عيني عينك
واللي مالي كرشه خيرك
واللي بيبيعك لغيرك
ولا شعب الشقيانين
شعب وكلاه البرومه
م الضرايب والحكومه
ولا شلة نصابين
يا وطن بتحب مين
داللي طهرلك ترابك
دست فوقه بجزمتك
لو تضحي باللي شالك
مش هتنجح خطتك
واعرف بقه
لو كنت ناوي تخمنا
وتجيب عدو فـ أرضنا
وتضحي بالروح والضنا
ملعون ترابك يا وطن
ملعون ترابك يا وطن