يحصل ويحصل..!!
**
يا عمنا يحصل ويحصل عندنا..
طب همَّه إيه .. ؟!
قول أي حاجه
بس ليها اربع رجول
وعشان كده..
" يحصل في كل الدنيا تغيير كل حاجه ..
إلاَّ هنا .."
يا عمنا .. يعجبني قولك في الصميم
وما هوش ملون غير لونين
أبيض .. و إسود
والرمادي إبن كلب ما تعرفوش ..
واحنا معاك
يعجبني قول :
" إن نام غضنفر قام غضنفر مننا "
وفهمنا قصدك .... يعني يبقوا مننا..!!
وواجهت بالقول الغليظ كل الوشوش
وشخطت ومسكت الحروف
نبوت يدق على البيبان
ومسحراتي في الليالي المعتمه
لاحد قاد قنديل في حاره وقال آمين
ولا حد قام يمشي ف ضياك
الكل سامع غنوتك
كل الغناوي طعم واحد في الودان
والحق مقطوع اللسان
والحلوه نايمه في السكات / ست البنات
قايمه في عز الضلمه تعجن في الأهات
ولا حد شاط ..
ولا حد قام يفتل يبوح م الضي قول
ويشوط غوازي الليل وتجار الكلام
وعشان كده ..
" يحصل في كل الدنيا تغيير كل حاجه ..
إلاَّ هنا .."
يا عمنا .. يا دون كيشوت في الزمان المستحيل
قلنا تور ..
قالوا احلبوه .. !!
قلنا ديك ..
قالوا بكره يبيض ويفقس ألف ديك ..!!
وما صدقوش ..
إن العبيط بيموت عبيط
" وابن الملك لو كان كتابه يكون ملك
وابن الرئيس يصبح رئيس بالزمبلك .."
وعشان كده ..
" يحصل في كل الدنيا تغيير كل حاجه ..
إلاَّ هنا .."
يا عمنا .. وصل الجراد
أشئش في نوَّار الغيطان
طلعت فتاوي مزهزهه
متفصَّله على قد توب المفتونين اللي هنا ..
إن الجراد دا شيء جميل .. ملهوش مثيل
يهبل بطعم الجمبري ..!!
يللا اجمعي يا صابحه غيطك ..
ودعي زمن الخضار
إملي الصوامع بالفلوس
قيدي الفانوس اللي اتحرق على بوابتنا
في زمان الانتظار
كل الفتاوي جد جد ومش هزار ..
ولا حد ضج ولا استجار ..!!
وعشان كده ..
" يحصل في كل الدنيا تغيير كل حاجه ..
إلاَّ هنا .. "
يا عمنا .. يحصل ويحصل عندنا
النيه بيضه والقلوب بفته وحليب
اسكت خلاص .. ما انت ف كلامك قولتها :
" لا أي أي وزي زي إلاَّ هنا .. "
إسكت بقى ..
الفوله لسَّه محمصه
والناس عيونها مدعمسه
وعقولها بيضه ممششه
وإيديها نايمه مجبسه
والفكره خرقه مكرمشه
والخطوه عارجه مكسكسه
وعشان كده ..
" يحصل في كل الدنيا تغيير كل حاجه..
إلاَّ هنا .. "
...
ـــــــــــــــــــــــــ ـــــــــــــــــــــــــ ـــ
الشعر بين العلامات من قصيدة
" يحصل "
شعر الدكتور / يسري العزب