ياللا نسامح
زهرة قلبي شذاها دا بلسم
وردالحب ما يجرحشي
أيوة بحبك لسة بقولها
وإسمك نبضي ما بنكرشي
ليه الكره يغطي سماكي؟
وحبي دا شمس ما بتغبشي
ليه الحقد يداري الود
قلبي دا نهر سقاكي الروح
جوة ضميرك ما تموتشي
أيوة, دا قلبي هواكي في يوم
ولسة هواكي ما بيدوبشي
أنا حبيتك أنا خليتك
زهرة جميلة
في قلبي تدوم ولا تدبلشي.
أنا حبيتك دمعة وفرحة
أنا سكنتك جوا ضلوعي
قلبي دا بيتك فيه خبيتك
قلبي بيبانه ما تقفلشي
إنتي قصيدتي اللي أنا بعشقها
أنا ألفتك أنا لونتك
أنا لحنت وغنيتك
غنوة حب بصدق رقيقة
لأي أغاني ما تشبهشي
أيوة بحبك لسة وقلبي
إسمك نبضه
ورسمك صورته
وعهدك حضنه
أيوة بحبك ولا أخونشي
أيوة يا (زهرة ) ولسة عبيرها
تاريخ للحب ورمز الود
اللي ما ضاعشي
لأن الحب دا كف حرير
تمسح كل ركام الزيف
وتيجي في ليلك زي الطيف
نور وبيضوي عينيكي سلام
يمسح دمعة نص الليل
أصل الضلمة ما بتدومشي
ياللا نسامح قلب لقلب
ياللا نصارح همس لهمس
كل ده قلبك ما سامحشي؟
إنتي الأمل الحلو في عيني
ترجعي يوم لمداين قلبي
قالوا زمان في المثل الحي
(اللي يحب ما يكرهشي)