اعتـــــــذار
آسف يا ابني
مش هتألم
مش هذرف دمعاتي عليك
آسف يابني
مش هتكلم
مش هصرخ باسمك / أناديك
أنده مين
دول قتلوك
وانت ف رحم الأم جنين
أنده مين
أنده مين و الكل خلاص
صم بكم
لا أنفاس
لا احساس
حتى القلم التايه دايما
جوة سطور الحلم اهو خانني
رافض يكتب لك عن حزني
رافض يبقى الدم مداده
نفسه يغني
...............
قسما يابني
قسما لارمي القلم الخاين
و اكتب بالقلم / السكين
و افتح جرح الوطن النايم
وابدأ بالموصل و جنين
قسما يابني
مش هتألم
بعد ما شوفتك قلبي اتعلم
يكتم حزنه
يحبس دمع العين جواه
لجل ما يتحول لقنابل
لجل يقاتل
لجل يرجع حق الوطن المقتول فيك
جوة عنيك
شفت الشمس بلون الدم
شفت الأم
لحظة موتها بتصرخ
ابني
اوعاك يابني تموت جوايا
قوم يا ضنايا
خد تار أمك
أرضك / وطنك / دينك / دمك
اوعاك ترمي سلاحك مرة
أرضك حرة
طول ما سلاحك شايلاه يدك
اوعى يصدك
أي جبان للأرض يشدك
قالت كلمة الأم و ماتت
يا كل الأمة العربية
بعد هوانكم
كيف أحوالكم
لسة ياترى بتناموا ف ليلكم؟
ليلكم طول
مالهوش آخر؟؟
امتى يا ناس الليل يتاخر
امتى يا ناس الليل يتاخر