قولت في يوم اعمل ولد
واخرج اشوف حال البلد
دخلت من كل البيبان
بصيت في كل البلكونات
لفيت بلدنا حتة حتة بالشوارع والحارت
حسيت كأن الشعب غرقان في السكات
نديت يوميها بأعلى صوتي
فوق بقى كفاياك سبات
قوم بقى يا شعب ادمن الممات
رد عليه عم حملي
مين اللي قال الشعب مات
لو مش مصدق الكلام
عاوز في يوم تسمع بودنك الصوات
روح شوف في يوم كرة القدم
ماتش المحلة والاتحاد
تسمع صريخ تسمع صوات
تسمع شتيمة وخناقات
قال ايه يقولوا ان الحكم
جاي يحكم الماتش وناسي الانذرات
او روح في يوم حفلة غنا
مطرب وحواليه البنات
وشبابنا كله بينحني
ويا الاغاني والاهات
او روح في يوم مخبز تلاقي
الف واحد م البشر نازلين صوات
ـــ يا عم سيد العيش بسرعة
احسن ميعاد الشغل فات
ـــ يا عم سيد انا جي قابله
واقف هنا من اربع ساعات
ـــ وانتي يا ست اتاخري حبة
وللا ارجعي صف البنات
او خش بيت خالتي ذكية ام عنيات
تسمع صريخها وهي بتنادي بصوات
يقطع ده يوم اللي اتولد فيه البنات
يارب لو حتة ولد
يخرس لسان الشمتنات
بعد كده جاي تقول الشعب غرقان في السكات
وللا تقول ان الوطن سخسخ ومات
وللا انت قصدك ع السياسة
وللا كلام الجرنالات
لو انت كان قصدك كده
شوف الحكاية وباختصار
يوم ما العرب اخدوا القرار
ان الحروب ما بتنتهيش الا بدمار
وان البلاد ما بتتبنيش تحت الحصار
ساعتها كل الشعب لان
كله سكت كله استكان
واللي يفوق من نومه حبه
يصرخ يقول انا مش جبان
وللا يقول لو بالغلط
مين للفلوجة وللشيشان
ساعتها يجي الامن ياخده يكسر زلط جوة اللومان
قولتله ده كلام مش غلط
بس الحكاية مش كده
والصورة مش غامقة كده
قالي لو فيه حل قوله
وانا معاك في الحل ده
قولت راح ابدا بنفسي
واصرخ واقول باعلى حسي
يا شعب فوق قوم بقى
الحل فينا ومننا
لما نعود لربنا
ونِعلم الكون اننا
فوقنا من النوم والسبات