عينيك ياسمرة قتالين بلا سلاح=واللي يشوفك يسبح الإله
واللِّي يشوفك ياسمرة مايرتاح=يتمحمح قلبو وتسكنوا الآه
غرامك ياسمرة ماعندو مفتاح=واللي حَبِّك ضاع في سحرك وتاه
وصفك يزيان في الخاطر يملاح=واللي يقولوا رمشك نقراه
مكتوبي أنكون سندباد سواح=وبحر حبك يا سمرة أداه
مكتوبي نسافر بين الورد الفواح=لا سلطان ونجيبك ولا جاه
ياتمحاني اطلقت لقلبي السراح=من همو ضيعني وضعت امعاه
ماذا هبَّط جدي آدم قا التفاح=وبعد الجنة ولَّى تايه في منفاه
لولا رحمة ربي ماشاف أصباح=والمكظوم أذا طلبوا لبَّاه
الدنيا فانية واللِّي فيها تشباح=أنْوَصِّيك هذا القليب الكَيْ أدواه
اصبر حتى وتضرك لجراح=ما تقول كيفاه ما تقول ومناه
صلِّي واطلب التوبة والصَّلاَحْ=كَثَّرْ من المعروف غدوة تلقاه
قوادري جاب القول يا فُصَّاح=يلعن إبليس خوف ربي تقواه
الادريسية عنواني بر الصلاّح=آخر دعوة ربي يحسن مثواه
ويغفرلوا يوم أينادي البرَّاح=ويا ويح اللِّي عصا مَنْ أنهاه
ويرحم امة من سرى بلا جناح=ويرحم اللي علموا واللّي رباه