أحلي الحروف فـ اسمها واكتبها بالياسمين
والقلب من حسنها ......دايب بقالوا سنين
عاشق تراب أرضها والناس دي مش فاهمين
دي الروح يادوب مهرها تطلب واسد الدين
ياللي انت بتحبها...إزرعها ورد وفل
واغزل حروف إسمها طرحة وعليها التُل
وابني صروح مجدها يشهد عليها الكل
واوعاك فـ يوم تنحني أو مره ترضي بذل
إشرب سبيل نهرها وامحي آثار المُر
واروي عطش أرضها واخلع جذوع الشر
وافرد قلوع عزتك فـ البحر أو عـ البر
خلي التاريخ يوصفك... ثائر ودمك حُر
إمسك بإيد دفتك..... خلي السفينه تمُر
تمشي بسلام فـ البحر وتصيد في لولي ودُر
دوس عـ الصعاب كلها واياك في يوم تنْجر
مهما تقابلك محن.... إوصل لأبعد بر
لملم جراح فرقتك.. وحّد أيادي الناس
هتلاقي فيهم بشر زي الدهب والماس
واللي تبان خسته تحت المداس ينداس
وارفع جبينك فوق واوعي توطي الراس