فكرة بتعاند فكرة
وانبارح بيطاوع بكره
وبسرعة ومن غيرما يفكر
يفتحله الأوكره
وان جات الريح عرت ضهره
يحدفلوه الستره
الفكرة محتاجة دليل ا
والتانية فى الأصل دليل
ندمجهم سوا راح هنلاقى
ازهار ونحيل
وجدور الشجر المتعافـى
شمع وقناديل
بتغذى الفرع الدبلان
يطرح انسـان
زيِّ الشمس فى تكوينه
بلهيب وحنان
احلامكـ شابت يا بن العشرين
احزانكـ تابلوه مرسوم
وجدار مهدوم
علق تابلوهكـ على سدركـ
هيزيده هموم
الهم اتجمع على وشكـ
زيِّ النمل الملموم
على حتة سكر
وعنيكـ لدموعكـ بوابة
ممنوع تتسمكر
وبتعنى الحظ باشعارك
والصفو اتعكـر
راح اقولكـ كلمة لوجدانكـ
ترجمهـا من غير ما تفكر
البسمة قُوتكـ وسلاحكـ
للدنيـا أجمل مفتاح
بتزرع حنضل وبتأمل
تجنى التفاح
على أد كفاحكـ هتلاقى
موكب أفراح
و بيأسر حزنكـ بقيوده
يملى الأقداح
بالشهد وبيرطب جوفكـ
يقتل أشباح الخوف المفجوعة
والضحكة من بعد الوحدة
أضحت مسموعة
________
كُتبت بتاريخ
19/4/2012
الساعة 2:30 مساء