جراد الصحرا

[جراد الصحرا

فرَّقوا شربات،زغرتوا يابنات
هيَّصوا وارقصوا،وافرحوا ياعيال
حالنا خلاص صار أحسن حال
شيخ الأزهر قام وبهِمَّه
إتوَضَّا وصلَّى ولف العمه
ثم تبَسَم بعد ماسَبِّل
لينا عيونه وسمَّى وكَبَّر
ثم تبسم تانى وأصدر
فتوى جريئه صريحه وقال
أكل جراد الصحرا حلال

وبحنِّية مسئول عنَّا وعن أحوالنا
أعلن إن مصيرنا الجنه
لو قرَّرنا واتشطَّرنا...
وقمنا بدور فعَّال فى الأزمه...
وتبقى مناسبه أكيد ومحاوله
نكسب بيها ثواب فى الدوله

إفرحى ياحكومة الإنترنت
ياللى بتمشى بأمر الست
والنَنُّوس اسم الله عليه
اللى مصيرنا خلاص ف إيديه
صاحب اللجنه سعادة البيه
إبن الوالى وإبن الست

من بكره خلاص انا مش محتاج
لحمه وأسماك
أنا قررت ف كل جدار نفتح شبّاك
ونشيل الشيش ونحط شِباك
ونقوم ياولاد نصطاد بروتين
بعد ماجوْعنا سنين وسنين
جالنا لحد البيت ببلاش
قولوا معايا بصوتكو العالى
عاشت لينا حكومة الكذب.....
وعاش الحزب الواحد
عاش.....
إسكندرانى
30/11/2004

الأخ الكريم اسكندراني
نادرا ما أتمتع بالشعر العامي
لكن قصيدتك كانت ذات تميز وجمال وحلاوة... فاستطاعت أن تستدرجني إلى هذه الدوحة..

تحياتي أخي

ناصر

شكرا اخى ناصر

السلام عليكم ورحمة الله وبركاته

اخى الكريم اسكندرانى

كلماتك تحمل مزيجا من الحزن المغلف بالسخريه

لكن اسمح لى بتحفظ على الاشاره من قريب او بعيد الى الرموز الدينيه فانا لا اتفق معك فى نقدها بهذا الشكل

حتى لا ندع الامور تفلت من بين ايدينا باعطائنا الفرصه لاعداء ديننا وتقديم صوره مشوهه عن رموزنا الدينيه

وهذا لا يتفق نهائى تعاليم الدين وهدى النبى محمد صلى الله عليه وسلم بخصوص الامام


ارجو ان تتقبل هذه الهمسه فى اذنك من اخيك من باب النصيحه الواجبه ليس اكثر


تحياتى لك

محمد

شكرا اخى محمد وتأكد أننى لا أقصد الإساءة مطاقاً لا لديننا الحنيف ورموزه ولا لأى دين آخر ورموزه،ولكننى أقصد هنا استخدام الدين فى أغراض سياسية ولأهداف مشبوهة.شكراً مرة أخرى.

السلام عليكم ورحمة الله



الاخ الفاضل اسكندرانى


يالهذا الوجع القاتل

كلماتك تقتل الروح--عندما تكون الحقيقة مرة بهذا القدر المأساوي

لابد أن ننهض بأقلامنا ودمائنا لنضع حدا للذل والمهانة!!

دمت على هذا الوعي وفى أمان الله وحفظه

الف شكر اختى نعيمة على اسلوبك الراقى