إن قلت... ما تخافشي
أنا ليّا أبّ حكيمْ ياما روى أشعارْ خبرِة سنين وقديم إسمُه احمد الجزّارْ راجل.. تِقيل.. راسي والبسمه ما تفارقوش زي الجبل... راسي المحنه ما تهزّوش أنا قلت له: يابا ابنَك صَبَح شاعر بس الحياه غابه ماشي ف طريق واعر باكتب قصايد حقّ لكن باخاف تتقال أحسن يقولوا ( لأ ) ويسكِّتوا الموّال قام رَدّ قال: با ابني شِعرك عليك تاجَك هات الكلام وابني دا الحق محتاجَك إيه يعني لو منعوك أو حَطُّوا لِيك مِيت سَدّ؟ اسمع نصيحة ابوك إوعاك تخاف من حَدّ ما تقولش كلمة زيف وانْ وقَّفوك... إمشي خلّي قصايدَك سيف وان قُلت ما تخافشي خايف يا شاعر ليه؟! اصرخ بأعلى صوت وانْ مُتّ... فيها إيه؟ ما هو كلنا... هانموت إن عشت زي الغير... خايف... هتبقى معاه وانْ مُتّ لاجْل الخير... تبقى ف سبيل الله