عُيونك همّا حُراسى ونبراسى وقلبك هوّا إحساسى ودمك بجري فى عروقى غروبى إنتى وشروقى وإنتى دنيتى وناسى دا نور الشمس من نورك وصوت الحب مزمورك تغنى للنجوم تختال ويرقص عالنغم خيال فرسته معاه وأفراسى دا لو مكتوب لى ألف طريق وكل الدنيا ليّا رفيق تلاقينى بروح ليكى والاقى الصُحبه فـ عنيكى واشيل عطرك فى أنفاسى دا كل الدنيا عنوانك والاقى الفرح .. أحضانك ألاقى من الحنان أشكال يكون فيها الهوى رحال والاقينى ... أنا الآسى صُغير ما اعرف الدنيا وعمرى فيها كام ثانيه وأول ما احضنك بالعين تناغينى .. برمش العين وحبى ليكى إخلاصى لسانى اسم الله بتكلم ورجلى ماشيه تتعلم وايدك سانده تطويحى وفرحك هوا تفريحى وأبكى .. تجرى .. تحتاسى ولما كبرت يا امايا وعشتى عمرى ويايا هجرتك بعد طول العمر وسِبتك لليالى السُمر عشان شُغله تِعين راسى وأقعد فى بلاد الغُرب وأشرب من هوانى شُرب عشان قال أبني مستقبل ومين بالذل دا يقبل ولو واحد مهوش راسى ودعوة حب ضمانى فى ليل جارح وحضنانى تنادينى لأحضانك ربيع عمرى فـ ريحانك أعود والدعوه نبراسى وأرجع لك وانا م الشوق بسوق لك عمرى كله سُوق واشوفك .. لحظه .. من تانى بعيد عنك .... وانا الجانى وأرجع لك يا أنفاسى وراجع لك بريس مالى حياتى إنتى ... آمالى لقيتنى رجعت قدامك أبوس أحلامى ... أحلامك وأحضن تانى إحساسى أتارى الفرح دوّخنى واتارينى ببوس وهمى وقلبى قال لى: فين راحت؟؟؟ سألت الدنيا... إرتاحت؟؟!! تقولها ليا وتواسى أنا آسى .... أنا آسى أسيبك ليه يا أنفاسى أموت بعدك .. وانا فـ بعدك بضيع ... ومعايا ألماسى خلاص ... أعلنت إفلاسى شعر: حسن صلاح حسن