عيونك لما يوم بتنام
تعيش ليلك طاير هايم مع الأحلام
تخدك من بحور لبحور
تسبح فى فضاء مسحور
تفرًق فى الهوا همك
تغرًق حزن أيامك
وترجع بيك ووجدانك سعيد
مخدوع
تقابل جسمك الضعفان
بروح مهدوده مكسوره
مش عارفه تسيب الحلم
مش قادره
ولا قادره تعيش نايمه
ولا قادره تكون صاحيه
ولا فارق معاها الليل
ولا الألوان
ولا الكلمه ولا الصوره
ولا الجمله ولا المعنى
ولا معنى لأى سكوت
وحتى لو رفعت الصوت
مفيش فايده
وتبدأ
وتبدأ من جديد يومك
عايش ساعى كما الميت
وتتقيد
وتتقيد سنين عمرك
على سطرك
تشيلها معاك دموع دمك
وتحنى م الوجع ضهرك
وتتسند على الأوهام
عشان ترجع تنام تانى
مع همك
صديق عمرك
وتدفن كل أحزانك
فى خزنة قلبك الباكى
وتتغافى وتتواهم
بحلم جديد
ياخد مرك بعيد عنك
وتدعى من حشا قلبك
يدوم نومك
يموت جسمك
تعيش روحك
ومن تانى تسافر بيك
لأوهامك
لأحلامك
ومن غلبك
متنمشى