متيجى نعيدها من تانى
وإيه يعنى سنين مرت
يجوز أيوه حياه ماضيه
يعز علينا نسيانها
وجايز برضه كات فاضيه
يهون عالقلب نكرانها
نعيش اليوم عشان بكره
وإيه الأمس غير ذكرى !
واهى أيام وبتعدى
وغيرها كتير أكيد مرت
وقعنا وقمنا من تانى
وياما بكينا على جانى
عشقنا ف يوم هوا ضله
وداب شوقنا ولا نمله
يميل القلب على ميله
ونزهد فى الهوى غيره
نبكى الكون على حزنه
ونرمى اللوم على حالنا
يفرح يومنا من فرحه
ونخفى عنه أوجاعنا
يهجر فينا وندارى
وليلنا نعيشه نتمنى
لحد الفجر م ينادى
ونرجع نجرى عالجنه !
سيبنا القلب على كيفه
واهو بكيفه
لعب بقلوبنا وانكسرت
واهى أيام علينا مرت
متيجى نعيشها من تانى
بشكل جديد مهوش خاضع
ولا خادع
صفاء روحنا يعزف لحن
يحيى القلب
إيه مانع ؟!
نعيش اليوم عشان بكره
عشان معنى
يعيش معنا
دا بكره الجاى
بيندهلك بتوب منقوش
بميت معنى
مادام النبض لساه حى
يرج القلب
تسقط منه أوجاعنا
نلاقى براح بلون تانى
يحسه الصامم الأعمى
تعالى نعيشها من تانى
وننسى حزننا الماضى
نخلى الدمع للغالى
ولا نبكيش فى يوم واطى
ونرجع نبنى أرواحنا
ويبقى للحياه معنى
هتيجى نعيشها من تانى ؟
تعالى نعيش وإيه يعنى
سنين مرت