(الكشت) كلمة معناها التنزه في الصحارى والنفوذ ابتغاء الراحة والمتعة والطمأنينة والصفاء
أنا بالبر (اكشت) لوحدي إذن أنا موجود
والكشت ميزة تزيد النفس رقة و صفاوة
لاأنا ديكارت ولامن عيال بن صاهود
حضري مالل أدور لروحي شوية فضاوة
اسيح بالكثبان الي ظلها واسع و ممدود
ارعى النجم والليل فوقي ستر وغطاوة
ضايقن صدري ومزاجي شاعل مثل بارود
اعارك ذبابين وجهي بكل نزق وغباوة
ابي فكري ينجلي ويتخطى ازمنة وحدود
ايبيه يرتقي بدراج الروح يحلق علم وعلاوة
(فوردي) معي وزمزمي شاهي والما موجود
كشاف كهرب ورغيف خبز حار وحلاوة
وبندقي مخفي تحت سجادة صلاة وعمود
أدور حماية روحي ما أدورسلب و اتاوة
وراكن فوق هضبة رمل بارزة و نفود
اسمع فراقيات حلوة من صوت كله نقاوة
ولين ثوب الليل فوق صدر الكون مد مدود
والهوا الغربي يذعذع بكل خفة وطلاوة
وصوت الذيب منطلق بعزف منفرد عل العود
يشق استار الصمت يمزقها بعوي كله قساوة
اهوجس واسرد وفكري يروح و يرد ردود
امحي هموم دنياي من طفر وبعدهم وبلاوة
وبعد ساعتين من اخر كشتتي الشينة ياجود
غرز موتري وضعت مابين قاع وسماوة
لا انا عارف وجهتي ولا وين انا موجود
ولا هلي يدرون عني خالص ذكر وتلاوة
وصدفة مر(رويعي) مع عنيزات صغارن سود
ملثمن بشماغ ويجر فروة فيها وسع وفضاوة
قلت ذا الشيطان جاني ولابد انا اليوم مفقود
الله يستر(كلاها حمد) ويلي هاي اخرة الشقاوة
يقلي وراك يا حضري منفرد و مغرزن بنفود
ترى الطريق مو بعيد وراك بخمسة خطاوة
ارمح وشوفلك (شاص و ربع) يسحبك وتعود
لربعك كانك غريب منت من اهل البداوة
ترى الصحرا للي ماخبرها غرابيبن سود
ما هي بمنتزه ترى لا تاخذ كلامي بعداوة
فيها اثافي ومتاهات و مصاعبن بليا حدود
ال جاهلن بدروبها ما يجيه الاخوف وحماوة
ماهي لك يابو عيون خضر ومورد الخدود
يللي تفطر (الموزاريلا) هجوتي وتتعشى ببقلاوة
خجلت من بلاغة هاالرويعي لصغير النمرود
كنت احسبه الشيطان طلع اشد منه ضراوة
وبعد ذاك الدرس ياخوان حلفت للبر ما عود
بروحي اكشت ألف لا وخمس ملايين واوا
(ابي = أريد)
(فوردي= سيارة الفورد خاصتي) (زمزمي شاهي = براد الشاي)
ذبابين: جمع ذباب أي اصارع ذباب الوجه من شدة الملل
اهوجس : تشتد الهواجس بي
كلاها حمد : كلمة ومثل طريف اذا اشتد البلاء
مغرزن: عالق بالرمال
شاص وربع : انواع من سيارات الدفع الرباعي
هجوتي : أغلب ظني